Harbiy harakatlar sharoitida Ukrainadagi barcha Oʻzbekiston korxonalari oʻz faoliyatini toʻxtatdi. Bu haqda Tashqi ishlar vazirligi matbuot xizmati maʼlum qildi.
Qayd etilishicha, 2022 yil 1 yanvar holatiga koʻra, Oʻzbekiston Respublikasida Ukraina kapitali ishtirokidagi 173 ta korxona faoliyat yuritayotgan boʻlsa, shundan 96 tasi qoʻshma korxona, 77 tasi xorijiy korxonalardir. 2021 yilda 38 ta yangi korxona tashkil etildi.
2022 yil uchun tasdiqlangan maqsadli investitsiya dasturi doirasida Ukraina kompaniyalari ishtirokida umumiy qiymati 16,5 million dollardan iborat 4 ta investitsiya loyihasini amalga oshirish koʻzda tutilgan.
Xabarga koʻra, mavjud vaziyat tufayli yuqoridagi va boshqa ishlab chiqilayotgan investitsiya loyihalarini amalga oshirish qiyinlashadi.
