Электрон тижорат гиганти Alibaba Хитойнинг тўлдирилган реаллик кўзойнакларини ишлаб чиқарувчи Nreal компаниясига 60 миллион доллар сармоя киритди. Бу ҳақда Bloomberg хабар берди.
Маълум қилинишича, Alibaba’нинг рақобатчилари Tencent ва ByteDance молиялаштириш босқичида иштирок этди. Nreal’нинг 2021 йилдаги жами сармояси 200 миллион долларни ташкил этган, компаниянинг баҳоси ошкор этилмади.
Тўлдирилган реаллик кўзойнакларини ишлаб чиқарувчиси Nreal компанияси 2021 йил сентябрида эълон қилинган аввалги инвестиция раундида 700 миллион долларга баҳоланган. Alibaba’нинг Nreal’га киритган сармояси гигантнинг метаолам амбицияларини акс эттиради.
Метаолам — виртуал ҳақиқат, ижтимоий тармоқлар ва бошқа рақамли технологияларни бирлаштирган Интернетнинг келажакдаги версиясининг номи. 2021 йилда TikTok эгаси ByteDance VR-гарнитуралар ишлаб чиқарувчи Pico’ни сотиб олганди, Tencent эса Black Shark ўйин қулоқчинлари ишлаб чиқарувчисини сотиб олишга тайёрланмоқда.
Nreal’га 2017 йилда Американинг Magic Leap тўлдирилган реаллик (AR) стартапининг собиқ муҳандиси Сюй Чи томонидан асос солинган. 2019 йилда Magic Leap Сюйга қарши судга мурожаат қилиб, уни тижорат сирларини ошкор қилишда айблади, бироқ кейинчалик суд Nreal фойдасига қарор чиқарди ва иш тугатилди.
Alibaba Magic Leap’га 2016 йилда, компания АҚШдаги энг оммабоп стартаплардан бири бўлган пайтда сармоя киритган. Флоридада жойлашган компания ўзининг истеъмолчи гарнитурасини сотишга ҳаракат қилди ва шундан бери корпоратив хизматларга ўтди.
Nreal компаниясида 400 га яқин ходим ишлайди. Компаниянинг кўзойнаклари алоқа операторлари, жумладан, АҚШдаги Verizon Communications орқали сотилади. Nreal сармоядорлари қаторига йирик венчур капитал фондлари ва технология гигантлари: Kuaishou Tech, iQiyi , Sequoia China, Hillhouse ва Жек Манинг Yunfeng Capital компанияси киради.
Аввалроқ Alibaba акциялари қайта сотиб олиш дастури кучайтирилганидан сўнг 10 фоиздан кўпроқ ўсгани хабар қилинганди. Шунингдек, Хитой ҳукумати Alibaba’ни монополияга қарши қонунни бузгани учун жаримага тортгани ҳақида хабар берилди.
