Францияда суюлтирилган газни қабул қилиш учун янги сузувчи терминал пайдо бўлади. Бу ҳақда Les Echos хабар берди.
Маълум қилинишича, Франция давлат идоралари йирик энергетика компаниялари билан биргаликда Россия газига қарамликни камайтириш мақсадида Ҳавр портида суюлтирилган газни қабул қилиш учун янги терминал ўрнатишни режалаштирмоқда.
Қайд этилишича, Франция суюлтирилган газни қабул қилиш имкониятларини ошириш ва Россия газига қарамликни камайтириш учун мисли кўрилмаган ресурслардан фойдаланиш ниятида.
Ҳавр портида сузувчи терминал қуриш лойиҳаси Франциянинг Атроф-муҳитни ўзгартириш вазирлиги, TotalEnergies, GRTGaz энергетика компаниялари ҳамда Ҳавр, Руан ва Парижни бирлаштирган порт тузилмалари томонидан тайёрланмоқда.
Манбалардан бирининг сўзларига кўра, қарор ҳали якунлангани йўқ.
«Ҳаврдаги сузувчи суюлтирилган газ терминалининг лойиҳаси Россиядан газга қарамликни камайтириш ва етказиб бериш хавфсизлигини ошириш нуқтаи назаридан фойдали бўлади. Шунинг учун зарур рухсатномаларни тезлаштириш учун ҳамма нарсани қилиш керак», — дейди Энергетикани тартибга солиш комиссияси раиси Жан-Франсуа Каренко.
Унинг таъкидлашича, мақсад бир йил ичида қўшимча суюлтирилган газни қабул қилиш қувватини ишга туширишдир.
Шунингдек, сузувчи терминал йилига 50 тераватт/соат газ ёки 3,9 миллион тонна суюлтирилган газ импорт қилиши мумкин. У АҚШ, Қатар ёки Африкадан суюлтирилган газни қабул қила олади.
Аввалроқ АҚШ Европа билан 2022 йил 15 миллиард куб метр суюлтирилган газ етказиб беришга келишиб олгани хабар қилинганди. Шунингдек, Германиянинг энг йирик энергетика компанияси Россиядан газ сотиб олишни тўхтатгани ҳақида хабар берилди.
