Маиший техника ва компьютерлар ишлаб чиқарувчиси LG Electronics Россияга барча маҳсулотларини етказиб беришни тўхтатди. Бу ҳақдаги баёнот компания веб-сайтида эълон қилинди.
LG Electronics ушбу қарорнинг сабабини тушунтирмади. Компания баёнотида айтилишича, у «вазиятни диққат билан кузатишда давом этади» ва «барча одамларнинг саломатлиги ва хавфсизлигидан чуқур қайғуради». LG, шунингдек, гуманитар ёрдам саъй-ҳаракатларини қўллаб-қувватлашга содиқ қолади.
Бундан ташқари, Россияга янги инвестициялар ва технология экспортини дунёдаги энг йирик нефть конларига хизмат кўрсатувчи компаниялардан бири Schlumberger тўхтатади. Компания Россия ва Украина ўртасидаги можаронинг авж олишини «катта ташвиш» билан кузатганини ва ўз ходимлари, ҳамкасблари ва уларнинг оилалари саломатлиги, хавфсизлиги ва ҳимоясига эътибор қаратишини таъкидлади.
«Биз ушбу динамик вазиятни фаол равишда кузатишда давом этамиз ва ҳар қандай фаолиятни халқаро меъёрлар ва санкцияларга қатъий мувофиқ амалга оширамиз», — деди компания бош директори Оливье ле Пеш.
У можарони тўхтатиш ҳамда минтақада «хавфсизлик ва хотиржамликни тиклаш»га чақирди. Schlumberger маълумотларига кўра, компаниянинг Россияда 11 минг 500 ишчиси бор, уларнинг 95 фоизи Россия фуқаролари.
Яна бир йирик нефть конларига хизмат Америка кўрсатувчи компанияси Halliburton Россияда ишлашни дарҳол тўхтатишга қарор қилди. Ташкилот ушбу қарорни Россияга қарши санкциялар билан боғлади, бу Россия корхоналари, шу жумладан «айрим давлат мижозлари» билан операцияларни ва ҳамкорликни тақиқлайди.
Аввалроқ компания мамлакатга санкцияларга киритилган бутловчи қисмлар ва маҳсулотларни етказиб беришни тўхтатганди. Halliburton’нинг Россияда қўшма корхоналари йўқ. Halliburton Россияда «Роснефть», «Газпром», «Газпром нефть», «Лукойл» ва бошқа компаниялар билан ҳамкорлик қилган.
Аввалроқ Япония, Австралия ва Янги Зеландия Россияга қарши янги санкциялар киритгани хабар қилинганди. Шунингдек, Nestle Россияга Nespresso қаҳвасини етказиб беришни тўхтатиши ҳақида хабар берилди.
