АҚШ сенаторлари Ричард Блументал ва Марша Блекбёрн Россиянинг барча банкларига нисбатан санкциялар жорий этиш бўйича резолюция тайёрламоқда. Бу ҳақда The Wall Street Journal ёзмоқда.
Маълум қилинишича, резолюциянинг қабул қилиниши АҚШ Сенати томонидан Россиянинг барча кредит ташкилотларига, жумладан, «Газпромбанк»га нисбатан чекловлар жорий этилишининг қўллаб-қувватлашини англатади.
Блументалнинг сўзларига кўра, бундай санкциялар жорий этилган тақдирда Россия нефть ва газ сотишдан даромад ололмайди. Шунингдек, санкциялар бошқа барча мамлакатларнинг Россия билан бизнес юритишига ҳам тўсқинлик қилади.
«Хитой нефть сотиб олиши мумкин, лекин бунинг учун пул тўлай олмайди», — дейди сенатор.
АҚШ, Буюк Британия, Канада ва Европа Иттифоқи Украинага ҳарбий хужум бошланганидан сўнг Россиянинг энг йирик компаниялари ва банкларига қарши санкциялар киритди. «ВТБ», «Сбербанк», «Откритие», «Газпромбанк», «Альфа-банк», «Промсвязьбанк» ва бошқа кредит ташкилотлари турли хил чекловлар билан рўйхатга киритилган.
Санкциялар доирасида «ВТБ» ва бошқа бир қанча банкларнинг Америка ва Британиядаги активлари музлатилган. Шунингдек, рўйхатларга киритилган айрим банклар SWIFT халқаро тўлов хабар алмашиш тизимидан узилган.
Шу билан бирга, АҚШ «Газпромбанк»га қарши санкциялар қўлламаганди, чунки ЕИ дипломатлари Россия гази импорти учун тўловларни амалга ошириш имкониятини сақлаб қолиш зарурлигини маълум қилди.
Bloomberg агентлигининг қайд этишича, ЕИ давлатлари орасида Россияга қарши санкцияларни кенгайтиришнинг асосий рақиби Германия бўлган. Берлин, хусусан, Россиянинг энергия ташувчиларига нисбатан санкциялар қўлланилишига, «Сбербанк»нинг SWIFT тизимидан узилишига ва Россиянинг денгиз портларига киришини чеклашга қарши чиққан.
Аввалроқ АҚШ Хитойни санкциялар фонида Россияга ёрдам бериш оқибатларидан огоҳлантиргани хабар қилинганди. Шунингдек, Дмитрий Песков Россия Ғарб санкцияларидан ўз манфаати учун фойдаланишга ҳаракат қилаётганини айтгани ҳақида хабар берилди.
