Gʻarb sanksiyalari fonida Xitoy va boshqa davlatlarning Moskvaga yordam berishga urinishlari eʼtibordan chetda qolmaydi. Bu haqda Gʻarb OAVlari AQSH milliy xavfsizlik boʻyicha maslahatchisi Jeyk Sallivanga tayanib xabar bermoqda.
Uning taʼkidlashicha, bunday harakatlar “muqarrar” oqibatlarga olib keladi.
Avvalroq AQSH, Yevropa Ittifoqi va yana bir qancha davlatlar sanksiyalari tufayli Rossiya 300 milliard dollarlik oltin-valyuta zaxiralaridan foydalanish imkoniyatidan mahrum boʻlgandi.
Rossiya moliya vaziri Anton Siluanov mamlakat zaxiralarining bir qismi yuanda boʻlgani uchun Gʻarb Xitoyni sanksiyalarga jalb qilishga urinayotganini aytdi. Uning soʻzlariga koʻra, Gʻarb Xitoydan Rossiyaning oʻz milliy valyutasiga kirishini cheklashini, shuningdek, oʻzaro savdoni cheklashni xohlaydi.
