Хитой компьютерлари Россия ва Украинага киберҳужумлар учун америкалик ҳакерлар томонидан бузиб кирилгани маълум қилинди. Бу ҳақда Хитойнинг Xinhua агентлигига таяниб Reuters хабар бермоқда.
Маълум қилинишича, Хитой февраль ойидан бери узлуксиз киберҳужумларни бошдан кечирмоқда.
«CNCERT/CC мониторинги шуни кўрсатдики, февраль ойининг охиридан бери Хитойда интернет доимий равишда чет элдан киберҳужумларга дуч келмоқда. Бу хорижий гуруҳлар Россия, Украина ва Белоруссияга киберҳужумлар уюштириш мақсадида мамлакатдаги компьютерларни назорат остига олиш орқали ҳужум уюштирди», деди Хитойнинг Миллий киберхавфсизлик маркази (CNCERT/CС) матбуот хизмати.
CNCERT/CC таҳлилига кўра, ҳужумларнинг аксарияти АҚШдан амалга оширилган. Бироқ, баъзи манзиллар Германия ва Голландияга ишора қилади.
Қайд этилишича, киберҳужумлар АҚШ ва унинг иттифоқчилари ҳамда Хитой ўртасидаги кескинликнинг асосий манбаи бўлган. Чунки АҚШ Хитойни глобал кибер жосуслик кампаниясини юритишда айблайди. Хитой киберҳужумларда иштирок этмаслигини айтиб, бундай айбловларни «ёмон туҳмат» деб атаган.
Аввалроқ Хитой Россия компанияларига самолёт қисмларини етказиб беришдан бош тортгани хабар қилинганди. Шунингдек, АҚШ Россияга қарши санкцияларни четлаб ўтадиган Хитой компанияларини огоҳлантиргани ҳақида хабар берилди.
