Rossiyadan Samarqandga uchgan samolyot Qozogʻistonga favqulodda qoʻnishni amalga oshirdi. Bu haqda Uzbekistan Airports matbuot xizmati xabar berdi.
Maʼlum qilinishicha, Sankt-Peterburg–Samarqand yoʻnalishi boʻyicha AFL-2870 parvozini amalga oshirayotgan, bortida 56 ta yoʻlovchisi boʻlgan “Aeroflot” aviakompaniyasi havo kemasi mahalliy vaqt bilan soat 10:50 da yoʻlovchilardan birining (Oʻzbekiston fuqarosi) salomatligi yomonlashgani va unga shoshilinch tibbiy yordam koʻrsatish zarurligi sababli, Qozogʻistonnig Qiziloʻrda aeroportiga favqulodda qoʻnishni amalga oshirgan.
Dastlabki maʼlumotlarga koʻra, yoʻlovchining yurak xastaligi xuruji alomatlari kuzatilgan. Ekipaj samolyotni eng yaqin aeroportda qoʻndirishga qaror qilgan.
Aeroportga qoʻngach, yoʻlovchi tez tibbiy yordam mashinasida malakali tibbiy yordam koʻrsatish uchun tibbiyot muassasasiga olib ketilgan. Shuningdek, Toshkent vaqti bilan soat 12:20 da, bortida 55 ta yoʻlovchisi boʻlgan “Aeroflot” aviakompaniyasining samolyoti Samarqand aeroportiga qoʻnishni amalga oshirgan.
Avvalroq Uzbekistan Airways Moskvaga qoʻshimcha aviaqatnovlarni yoʻlga qoʻyishi xabar qilingandi.
