Navoiy kon-metallurgiya kombinati 2 ta davlat korxonasi va aksiyadorlik jamiyatiga boʻlindi. Bu haqda jamiyat matbuot xizmati xabar berdi.
Qayd etilishicha, 2022 yilning 1 yanvar kunidan boshlab “Navoiy kon-metallurgiya kombinati” davlat korxonasi negizida 3 ta mustaqil korxona — “Navoiy kon-metallurgiya kombinati” aksiyadorlik jamiyati, “Navoiyuran” davlat korxonasi, “Navoiy kon-metallurgiya kombinati jamgʻarmasi” davlat muassasasi tashkil qilindi.
Maʼlum qilinishicha, soʻnggi uch yilda Navoiy kon-metallurgiya kombinatini transformatsiya qilish boʻyicha ishlar olib borilgan.
Bunda Prezidentining 2020 yil 6 martdagi “Navoiy kon-metallurgiya kombinati” davlat korxonasini isloh qilish chora-tadbirlari toʻgʻrisidagi qarori, Vazirlar Mahkamasining 2021 yil 30 martdagi “Navoiyuran” davlat korxonasi, “Navoiy kon-metallurgiya kombinati” aksiyadorlik jamiyati va “Navoiy kon-metallurgiya kombinati jamgʻarmasi” davlat muassasasi faoliyatini tashkil etish toʻgʻrisidagi qarori dasturilamal boʻlgan.
Maʼlumot uchun, Navoiy kon-metallurgiya kombinati va Olmaliq kon-metallurgiya kombinati Oʻzbekistonda asosiy soliq toʻlovchilar hisoblanadi.
