Тижорат банкларининг жами кредит қўйилмалари 2026 йил 1 октябрь ҳолатига кўра ўтган йилнинг шу даврига нисбатан 13,2 фоизга ошиб, 659 трлн сўмни ташкил этди. Бироқ саноатга берилган кредитлар қолдиғи шу даврда 8,8 фоизга камайиб, 146,3 трлн сўмдан 133,4 трлн сўмга тушди. Бу Марказий банк маълумотларида келтирилган.
Кредит қолдиғи — банклар берган ва ҳали қайтарилмаган кредитлар ҳажми. Унинг камайиши, масалан, корхоналар янги кредит олганидан кўра кўпроқ қарз қайтарганини ёки кредитлар бошқа тоифага ўтказилганини англатиши мумкин. Марказий банк пасайиш сабабини изоҳламаган.
Саноат кредит қолдиғи камайган ягона соҳа бўлди. Унинг жами кредит портфелидаги улуши 25,1 фоиздан 20,2 фоизга тушди.
Энг тез ўсиш қурилишда кузатилди: бу соҳага кредитлар қолдиғи 33 фоизга ошиб, 22,9 трлн сўмга етди. Савдо ва умумий хизматлар соҳасида кредитлар 32 фоизга кўпайиб, 53,9 трлн сўмни ташкил этди.
Жисмоний шахсларга берилган кредитлар 19 фоизга ошиб, 248,4 трлн сўмга етди. Уларнинг жами кредитлардаги улуши 35,8 фоиздан 37,7 фоизга кўтарилди. Бир йилда кредит портфели 76,9 трлн сўмга кўпайган бўлса, унинг қарийб ярми — 39,7 трлн сўми аҳолига берилган кредитлар ҳисобига тўғри келди.
Бошқа соҳаларда ҳам ўсиш қайд этилди: қишлоқ хўжалиги кредитлари 14,5 фоизга (68 трлн сўмгача), транспорт ва коммуникация кредитлари 16,4 фоизга (37,9 трлн сўмгача) ошди.
