Ford компанияси 2022 йилда бозорга чиқадиган Ranger пикапининг кейинги авлодини намойиш қилди. Бу ҳақда «Коммерсантъ» нашри хабар берди.
Эски Ford F-150 услубидаги дизайнга эга бўлган автомобиль ўзидан олдинги моделнинг ўзгартирилган платформасида ясалган. Ғилдирак базаси кенгайтирилган ва орқа осма янгиланган.Модель бир ва икки қаторли кабиналар, шунингдек, бир ярим кабинали вариант билан тақдим этилади.
Пикапда яхшиланган юк платформаси мавжуд бўлиб, у кузовга кириш учун стандарт оёқ таянчларини, кенгайтирилган юкларни чеклаш воситаларини таъминлайди. Шунингдек, электр жиҳозлари учун қўшимча розетка ўрнатиш мумкин.
Янги Ranger’нинг салон қисми пардозлаш учун яхшироқ материалларга эга бўлди. Унга вертикал экранли Sync 4 мультимедиа тизими, рақамли асбоблар панели, ҳайдовчининг электрон ёрдамчилари тўплами ва бошқа жиҳозлар киритилган.
Янги Ford Ranger ишлаб чиқариш Таиланд ва Жанубий Африкада йўлга қўйилади, модель эса 2022 йилнинг ўрталарида сотувга чиқарилади.
Аввалроқ Ford йўлтанламас Bronco’нинг пойга версиясини тақдим этганди.
