Сеул шаҳрида 25 ноябрь куни савдо-иқтисодий ҳамкорлик бўйича Ўзбекистон-Корея Ҳукуматлараро қўмитасининг 11-йиғилиши бўлиб ўтди. Бу ҳақда Инвестициялар ва ташқи савдо вазирлиги матбуот хизмати хабар берди.
Маълум қилинишича, тадбирга Ўзбекистон бош вазирининг ўринбосари — инвестициялар ва ташқи савдо вазири Сардор Умурзоқов ҳамда Корея савдо, саноат ва энергетика вазири Мун Сун Вок ҳамраислик қилган.
Қайд этилишича, йиғилиш давомида инвестициялар, савдо, саноат, қишлоқ хўжалиги, инфратузилмани ривожлантириш, энергетика, ахборот-коммуникация соҳаси ва соғлиқни сақлаш йўналишларида икки томонлама ҳамкорлик масалалари муҳокама қилинган.
Шунингдек, инвестициявий ҳамкорликни янада кенгайтириш, Ўзбекистон ва Корея ўртасида Эркин савдо тўғрисидаги битим лойиҳасини ишлаб чиқишни жадаллаштириш, Ўзбекистоннинг ЖСТга аъзо бўлиши борасида маслаҳатлашувларни фаоллаштириш, қишлоқ хўжалиги маҳсулотлари карантини соҳасидаги ҳамкорлик, инфратузилмавий ва энергетика лойиҳаларини амалга ошириш бўйича таклиқлар алмашилган.
Бундан ташқари, саноат кооперациясини йўлга қўйиш, қишлоқ хўжалиги, соғлиқни сақлаш ва савдо соҳаларида инновацион технологияларни жорий этиш, геология-қидирув, фойдали қазилмаларни кавлаб олиш, металлургия ва тўқимачилик саноати соҳаларида ҳамкорликни ривожлантириш бўйича қатор таклифлар ишлаб чиқилган ва ҳар томонлама кўриб чиқилган.
Учрашув якунида тадбир давомида эришилган асосий келишувлар ва икки давлат ўртасидаги кўп қиррали ҳамкорликни янада чуқурлаштиришнинг асосий механизмларини акс эттирувчи якуний баённома имзоланган.
Аввалроқ Тошкентда ЖСТга аъзо бўлиш бўйича тренинг ва семинар ўтказилгани хабар қилинганди.
