Ўзбекистонда банкоматларни маҳаллий ишлаб чиқариш имкониятлари ўрганилади. Президент Шавкат Мирзиёев бу ҳақда Тошкент вилоятининг Юқори Чирчиқ туманидаги «NURA Electric» электротехника заводига ташрифи чоғида топшириқ берди, деб хабар қилди Президент матбуот котиби.
Матбуот котиби маълумотига кўра, ўтган йили мамлакатда 9 мингта банкомат харид қилинган, импорт ҳажми 50 млн доллардан ошган. Савдо ва кўнгилочар мажмуалар ҳамда янги уй-жой массивлари кўпайиши билан банкоматларга талаб яна ортиши кутилмоқда.
Банкоматларга бўлган талабни ҳисоб-китоб қилиш, технология ва инвесторларни жалб этиб, уларни маҳаллий ишлаб чиқариш имкониятларини ўрганиш вазифаси қўйилди.
Топшириқ қайси идорага юклатилгани ва уни бажариш муддати маълум қилинмаган.
Матбуот котиби электротехника соҳасида маҳаллий ишлаб чиқариш учун бошқа имкониятларни ҳам санаб ўтди:
- Тошкент вилояти — энергия батареялари ва электроника учун юпқа мис фольга;
- Жиззах — электромобиллар учун инверторлар ва қувват олиш қурилмалари;
- Наманган — сув насослари учун энергия тежамкор электр двигателлар;
- Қорақалпоғистон — серверлар учун узлуксиз электр таъминоти ва совитиш тизимлари.
Ташриф давомида Президент электротехника тармоғида ишлаётган тадбиркор ва инвесторлар билан учрашди.
