Қозоғистон ва Ўзбекистон ўртасидаги учта чегара ўтказиш пунктида 9 ноябрдан бошлаб электрон навбатни банд қилиш учун юк ташувчилар 86 500 тенге (тахминан 2 миллион 261 минг сўм) миқдорида кафолат пули киритиши керак бўлади. Ҳайдовчи белгиланган вақтда чегарага етиб келса, пул тўлиқ қайтарилади.
Янги тартиб “Қозиғурт”, “Б. Қонисбаев” ва “Атамекен” чегара ўтказиш пунктларида амал қилади. Туркистон вилояти Давлат даромадлари департаменти маълум қилишича, кафолат пули 20 ойлик ҳисоб-китоб кўрсаткичига тенг. Электрон навбатни банд қилишдан олдин ташувчи ушбу маблағни махсус электрон ҳисобварағига киритиши керак.
Агар юк машинаси белгиланган вақтда етиб келмаса, бу ҳолат 90 календарь кун ичида кетма-кет икки марта такрорланган тақдирда, ташувчи кафолат пулидан маҳрум бўлади. Маблағ Қозоғистон давлат бюджетига ўтказилади.
Департамент янги тартиб чегара пунктларида сунъий навбатлар юзага келишининг олдини олиш учун жорий этилаётганини билдирди. Юк ташувчиларга электрон ҳисобварағини олдиндан тўлдириш ва қатновларни режалаштиришда янги талабларни ҳисобга олиш тавсия этилмоқда.
