Ўзбекистонда Покистоннинг Nishat Group бизнес гуруҳи иштирокида исломий банк ташкил этиш имконияти кўриб чиқилади. Шунингдек, компания Ўзбекистонда меҳмонхона соҳасида инвестиция лойиҳасини амалга оширишга қизиқиш билдирган.
Бу масалалар Ўзбекистоннинг Покистондаги элчиси Алишер Тўхтаев ва Nishat Group бош директори Муҳаммад Манша ўртасидаги видеоконференсияда муҳокама қилинди. Музокаралар якунида компания раҳбарияти ва мутахассисларидан иборат делегациянинг Ўзбекистонга сафарини ташкил этишга келишилди.
Суҳбат давомида меҳмонхона бизнеси, тўқимачилик саноати, озиқ-овқат маҳсулотларини қайта ишлаш ва ислом молияси соҳаларида инвестиция лойиҳаларини амалга ошириш масалалари ҳам кўриб чиқилди.
Нишат Гроуп вакиллари Ўзбекистонда исломий банк ташкил этиш имкониятларини ўрганишга қизиқиш билдирган. Компания Покистонда исломий банкинг бўйича амалий тажрибага эга экани қайд этилган. Ўзбекистондаги қонунчилик ва лицензиялаш талабларидан келиб чиқиб, алоҳида исломий банк очиш ёки маҳаллий ҳамкорлар билан қўшма банк лойиҳасини амалга ошириш вариантлари кўриб чиқилиши айтилган.
Меҳмонхона йўналишида эса Nishat Group бош директори компаниянинг Лаҳор ва Лондонда меҳмонхоналари борлигини, 2026-йил ноябр ойида Исломободда яна бир меҳмонхона ишга туширилишини маълум қилган. Унинг таъкидлашича, Ўзбекистонда туризмнинг ривожланиши ва меҳмонхоналарга талабнинг юқорилиги ушбу соҳада инвестиция киритиш учун имконият яратади.
Nishat Group Покистоннинг йирик бизнес гуруҳларидан бири бўлиб, тўқимачилик, банк-молия, қурилиш материаллари, суғурта, энергетика, меҳмонхона бизнеси, кўчмас мулк, қишлоқ хўжалиги, автомобилсозлик ва авиация соҳаларида фаолият юритади.
