Ўзбекистондаги қатор олий таълим муассасалари янги ўқув йили учун белгиланган супер-контракт қийматини эълон қилди. Бунда баъзи университетлардаги йиллик тўлов 22 миллион сўм атрофида бўлса, айримларида 200 млн сўмдан юқори шаклланган.
Ҳозирча университетлар орасида энг юқори миқдордаги супер-контракт Тошкент давлат юридик университетида қайд этилди. Олийгоҳ эълон қилган қийматлар жорий йилги кириш имтиҳонларида минималдан юқори балл тўплаган, бироқ баҳолари тўлов-контракт чегарасига камида 4,05 балл етмаган абитуриентларга мўлжалланган. Жумладан, бакалавриат йўналишидаги кундузги таълим супер-контракти қарийб 269 млн 960 минг сўмни ташкил этади. Уч йиллик кечки таълим учун йиллик супер-контракт миқдори 132,1 млн сўм, кундузги магистратурага 122 млн сўм, кечкиси 97,6 млн сўм этиб белгиланган.
Наманган давлат университети ҳам янгиланган табақалаштирилган тўлов (супер-контракт) миқдорларини эълон қилди. Кундузги таълим шаклида энг паст нарх 26,9 млн сўм, энг юқори қиймат эса 122,6 млн сўм этиб белгилаган. Даволаш иши, педиатрия ёки олий ҳамширалик иши йўналишларида ўқиш нархи 114,1 млн сўмни ташкил этади. Университетда кечки ёки масофавий йўналишда супер-контракт асосида таҳсил олиш 31,4 млн сўмдан бошланиб 128,5 млн сўмгача етади.
Тошкент ахборот технологиялари университетида бундан фарқли равишда контрактгача етмаган 4 баллик оралиқ учун табақалаштирилган нархлар белгилаган. Масалан, кундузги бакалавриатга контракт балига 1,05 балл етмаганлар супер-контракт учун базавий тўловнинг 1,5 бараварини тўлайди — 18,1 млн сўмдан 24,7 млн сўмгача. Агар 3,06 дан 4,05 баллгача етмаган бўлса, тўлов қиймати 36,3 млн сўмдан 49,6 млн сўмгача ошади. Масофавий таълим шакли учун эса етишмаган балл ва танланган йўналишдан келиб чиқиб нархлар 23,1 млн сўмдан 59,4 млн сўмгача белгиланган.
Наманган давлат педагогика институтида энг кам супер-контракт 22,9 млн сўм, юқори чегара эса 31,9 млн сўмгача етади. Мазкур тартиб кундузги ва кечки таълим йўналишларида ўқиш истагида бўлган, тўплаган баллари тўлов-контрактга 4,05 баллдан ортиқ етмаган ҳамда 56,7 баллдан кам бўлмаган абитуриентларга тааллуқли ҳисобланади.
Тошкент кимё-технология университети Янгиер филиалида супер контрактлар миқдори 22,2 млн сўмдан 48,1 млн сўмгача, Наманган давлат чет тиллари институтида эса 22,9 млн сўмдан 47,2 млн сўмгача белгиланган.
Андижон давлат педагогика университетида бакалавриатнинг кундузги таълим шаклида супер-контракт суммалари йўналишга қараб 29,6 млн сўмдан 37 млн сўмгача етади. Кечки таълим шаклидаги нарх эса 34,5 млн сўмни ташкил этади.
Андижон давлат чет тиллари институтида супер-контракт миқдори 29,6 млн сўмдан 47,2 млн сўмгача тўлов қилиш керак бўлади.
Ўз навбатида Андижон давлат университети эса миқдорни базавий контракт суммасининг тўрт бараваридан олти бараваригача тасдиқлаган. Бироқ университет вакиллари “Дарё”га ҳали базавий миқдор тўлиқ тасдиқланмаганини билдирди. Лекин супер контракт миқдори камайтириб борилаётгани айтилди. Масалан, аввал базавий қиймат 10 бараваргача етган, кейин нарх 8 бараварга туширилган. Эндиликда эса максимум олти бараварни ташкил этади.
Андижон давлат педагогика институти ҳам супер-контракт миқдорини базавий контрактнинг тўрт баравардан олти бараваргача этиб белгилаган. Қолган олийгоҳлар ҳозирча нархларни эълон қилмаган.
Қонунчиликка асосан, супер-контракт асосида ўқиш истагини билдирган абитуриент биринчи ўқув йили учун камида 50 фоиз тўлов қилиши керак бўлади. Кейин олийгоҳ ректорининг буйруғи билан ўқишга қабул қилинади. Супер-контракт асосида олийгоҳга қабул қилинган талабалар биринчи ўқув йилини муваффақиятли тугаца, кейинги ўқув йилидан бошлаб умумий белгиланган тартибда контракт тўлаб ўқийверади.
Ҳозир Ўзбекистонда жами 215 та олий таълим муассасалари фаолият юритмоқда. Уларда таҳсил олаётган талабалар сони 1,6 миллион нафарни ташкил этади.
