Ўзбекистонда кўп квартирали уйларни бошқаришни тўлиқ хусусий секторга ўтказиш режалаштирилмоқда. Бундан ташқари, хусусий компаниялар марказлашган иссиқлик таъминоти, сув таъминоти ва канализация соҳаларига ҳам фаолроқ жалб этилмоқда. Бу ҳақда Қурилиш ва уй-жой коммунал хўжалиги вазирининг биринчи ўринбосари Жалол Арашов 25 август куни Олий Мажлис Қонунчилик палатаси мажлисида маълум қилди.
Масала «Ўзбекистон — 2030» стратегияси доирасидаги давлат дастурининг 2026 йил биринчи ярмидаги ижроси муҳокама қилинганида кўтарилди. Депутат Фарҳод Зайниев дастурнинг давлат функцияларини хусусий секторга ўтказишни давом эттиришни назарда тутувчи 249-бандига эътибор қаратди ва уй-жой коммунал хўжалиги соҳасида айнан қайси функцияларни хусусий секторга ўтказиш режалаштирилаётганига аниқлик киритишни сўради.
«Сўнгги йилларда давлат функцияларини хусусий секторга ўтказиш бўйича жадал ишлар амалга оширилмоқда. Бу эса ўз навбатида бюджет маблағларини тежаш, соҳага соғлом рақобатни киритиш ва энг асосийси, истеъмолчиларга сифатли хизмат кўрсатишга хизмат қиляпти», — деди депутат.
Қурилиш ва уй-жой коммунал хўжалиги вазирлиги вакили ушбу ишларнинг учта асосий йўналишини санаб ўтди.
«Биринчи масала — кўп хонадонли уйларни бошқариш тизими тўлиқ хусусий секторга ўтказилади», — деди у. Биринчи ўринбосарнинг баёнотидан «хусусий секторга тўлиқ ўтказиш» кўп квартирали уйларни бошқаришнинг амалдаги шаклларини, жумладан, уй-жой мулкдорлари ширкати мақомини ўзгартиришни назарда тутадими-йўқми, аниқ эмас.
Эслатиб ўтамиз, амалдаги қонунчиликка кўра, кўп квартирали уйни бошқариш уч шаклдан бири орқали амалга оширилиши мумкин:
- бевосита жойларнинг мулкдорлари томонидан;
- шартнома асосида бошқарувчи ташкилот ёки бошқарувчи — якка тартибдаги тадбиркор томонидан;
- уй-жой мулкдорлари ширкати — битта ёки зич жойлашган бир нечта кўп квартирали уйда турар жойларнинг ва яшаш учун мўлжалланмаган жойларнинг мулкдорларини бирлаштирувчи нотижорат ташкилот томонидан.
Иккинчи йўналиш — марказлашган иссиқлик таъминоти. Унинг сўзларига кўра, вазифа аҳолига иссиқлик таъминоти сифатини ошириш учун хусусий бизнесни жалб қилишдан иборат.
У мисол тариқасида Тошкентни келтирди, у ерда иссиқлик таъминоти тизими аллақачон хусусий компания — Франциянинг Veolia компаниясига ўтказилган.
Шунингдек, вазирнинг биринчи ўринбосари Нукусдаги «РК-1» қозонхонасининг хусусий секторга ўтказилганини маълум қилди. Унинг сўзларига кўра, тегишли қарор президент қарори билан қабул қилинган, оператор сифатида эса Саудия Арабистонининг Saudi Tabreed компанияси иш олиб бормоқда.
Унинг сўзларига кўра, Бухоро бўйича ҳам алоҳида қарор қабул қилинган — у ерда марказий қозонхонани давлат-хусусий шериклик асосида хусусий секторга ўтказиш кўзда тутилмоқда.
Бундан ташқари, Урганч ва Зарафшонда ҳам марказлашган иссиқлик таъминотига хусусий секторни жалб қилиш бўйича ишлар олиб борилмоқда.
«Урганч ва Зарафшон шаҳарларининг ҳам иссиқлик тизимини, яъни аҳолини марказлашган иссиқлик билан таъминлаш, когенерация қилиш бўйича хусусий секторга бериш масалалари амалга оширилмоқда», — деди вазирлик вакили.
