Қонунчилик палатаси интеллектуал мулк обектларидан самарали фойдаланиш ва патент вакилларининг ҳуқуқларини кенгайтиришга қаратилган қонун лойиҳасини иккинчи ва учинчи ўқишда қабул қилиб, Сенатга юборди. Бу ҳақда қуйи палата матбуот хизмати хабар берди.
Қонун лойиҳаси билан 7 та қонун ва 4 та кодексга ўзгартириш ҳамда қўшимчалар киритиш кўзда тутилмоқда.
Ҳужжат билан интеллектуал мулк обектларига бўлган мулкий ҳуқуқларни гаровга қўйиш билан боғлиқ муносабатлар тартибга солинади.
Шунингдек, бундай ҳуқуқларни давлат рўйхатидан ўтказишнинг ҳуқуқий асослари мустаҳкамланади.
Бундан ташқари, патент вакилларининг интеллектуал мулк обектларига оид шартномаларни расмийлаштириш ва вакиллик қилиш бўйича ваколатлари кенгайтирилади.
Ўзгаришлар интеллектуал мулк обектларини рўйхатдан ўтказиш жараёнини соддалаштириш ва ортиқча маъмурий тартиб-таомилларни қисқартиришга қаратилган.
Интеллектуал мулкка бўлган мулкий ҳуқуқларни гаровга қўйиш имконияти ихтиро, товар белгиси ва бошқа интеллектуал активлар эгаларига уларнинг иқтисодий қийматидан фойдаланиб, молиявий ресурслар жалб қилиш имконини беради.
