Prezident Shavkat Mirziyoyev neft-gaz bozorida barqarorlikni taʼminlash, iqtisodiyot tarmoqlari va aholiga uglevodorod resurslarini uzluksiz yetkazib berish yuzasidan taqdimot bilan tanishdi. Bu haqda Prezident matbuot xizmati xabar berdi.
Taqdimotda yil yakunigacha suyultirilgan gaz ishlab chiqarish bo‘yicha reja qayta ko‘rib chiqildi. Davlat rahbari tomonidan dastlab belgilangan 520 ming tonna o‘rniga 606 ming tonna mahsulot ishlab chiqarish vazifasi qo‘yildi. Bu avvalgi rejadan 86 ming tonnaga ko‘p.
Qayd etilishicha, avgust oyida 27 ta quduqni ishga tushirish rejalashtirilgan. “Yangi Kultak”, “Niyoz”, “Qoratau”, “Marvarid” va “Tegirmon” konlaridagi ishlar hisobiga qo‘shimcha 887 ming kub metr tabiiy gaz qazib chiqarish imkoniyati yaratilishi kutilmoqda.
Quduqlarni burg‘ilashdan ularni gaz uzatish tarmog‘iga ulashgacha bo‘lgan jarayonlarni kunlik nazorat qilish, shuningdek, elektr ta’minoti va ishlab chiqarish infratuzilmasining uzluksiz ishlashini ta’minlash topshirildi.
Bundan tashqari, resurslarni asossiz ushlab turish, sunʼiy taqchillik yuzaga keltirish va narxlarni oshirishga qaratilgan holatlarning oldini olish boʻyicha nazorat oʻrnatishga koʻrsatmalar berildi.
