Iyun oyida Oʻzbekiston avtomobil bozorida faollik barcha segmentlarda oshdi, deya maʼlum qildi Iqtisodiy tadqiqotlar va islohotlar markazi.
Iyun oyida barcha turdagi avtotransport vositalari (yengil avtomobillar ham qoʻshilganda) savdosi 80,2 mingtadan oshib, may oyiga nisbatan 18 foizga koʻpaydi. Taqqoslash uchun, may oyida 68 mingta avtomobil sotilgan edi.
Avtomobillar savdosi mamlakatning deyarli barcha hududlarida oʻsdi. Pasayish faqat Jizzax viloyatida qayd etildi — u yerda koʻrsatkich 2,2 foizga kamaydi.
Eng yuqori oʻsish surʼatlari Surxondaryo viloyatida (33,7 foiz), Xorazm viloyatida (32,6 foiz), Sirdaryo viloyatida (29 foiz), Samarqand viloyatida (28,3 foiz), Qashqadaryo viloyatida (26,2 foiz) va Andijon viloyatida (26 foiz) kuzatildi.
Toshkentda iyun oyida 17,9 mingta avtotransport vositasi sotildi. Bu may oyiga nisbatan 9 foizga koʻp.
Yengil avtomobillar
Oy davomida yengil avtomobillar savdosi jami 61 400 donani tashkil etdi, bu may oyiga nisbatan 14% ga koʻp. Biroq, yillik hisobda (2025 yil iyuniga qadar) ular 23% dan koʻproqqa kamaydi (80 000 tadan).
Yangi yengil avtomobillar savdosi iyun oyida 11 foizga oʻsib, 24 mingtani tashkil qildi. Biroq yillik hisobda savdo hajmi kamaydi — oʻtgan yilning shu davrida 27,7 mingta yangi yengil avtomobil sotilgan edi.
Oʻsishning asosiy hissasini mahalliy ishlab chiqarilgan avtomobillar taʼminladi. Ularning savdosi 12 foizga oshib, 18,8 mingtani tashkil etdi. Xorijda ishlab chiqarilgan yangi avtomobillar savdosi esa qariyb 7 foizga oʻsib, 5,1 mingtaga yaqinlashdi.
2026 yilning birinchi yarim yilligida Oʻzbekistonda jami 157 mingta yangi yengil avtomobil sotildi. Bu oʻtgan yilning mos davriga nisbatan 3,5 foizga koʻp.
Ikkilamchi bozorda esa iyun oyida 37 mingdan ortiq yengil avtomobil sotildi. Bir oy ichida ushbu koʻrsatkich 16 foizdan ziyod oʻsib, birlamchi bozor oʻsish surʼatlarini ortda qoldirdi.
Shu tariqa, iyun oyida sotilgan yengil avtomobillarning umumiy hajmining qariyb 61 foizi yurilgan avtomobillar hissasiga toʻgʻri keldi.
Biroq 2026 yilning birinchi yarim yilligi yakunlariga koʻra, ikkilamchi bozorda savdo qisqardi. Olti oy davomida qariyb 240 mingta yurilgan avtomobil sotildi, bu oʻtgan yilning mos davriga nisbatan 18 foizga kamdir.
Elektromobillar
Iyun oyida birlamchi va ikkilamchi bozorlarda jami 8,4 mingta elektromobil sotildi. Bu may oyiga nisbatan 63,5 foizga koʻp.
2026 yilning birinchi yarim yilligida elektromobillar savdosi 40 mingtadan oshib, oʻtgan yilning mos davriga nisbatan 40 foizga oshdi.
Iyun oyida elektromobillar savdosi mamlakatning aksariyat hududlarida oʻsdi. Pasayish faqat Sirdaryo viloyatida qayd etildi — u yerda savdo 2,9 foizga kamaydi.
Eng yuqori oʻsish Jizzax viloyatida kuzatilib, bozor hajmi ikki barobardan ham koʻproq — 101 foizga oshdi. Buxoro viloyatida savdo 64,6 foizga, Fargʻona viloyatida esa 58,5 foizga koʻpaydi.
Elektromobillar bozorining asosiy qismi hanuz Toshkent hissasiga toʻgʻri kelmoqda. Iyun oyida respublika boʻyicha barcha elektromobillar savdosining qariyb 63 foizi poytaxtda amalga oshirildi. Bir oy ichida Toshkentda elektromobillar savdosi 78 foizga oshib, 5,3 mingtani tashkil qildi.
