Soliq qoʻmitasi fuqarolarning elektron pochtalariga soliq qarzi mavjudligi va uni toʻlash zarurligi haqida xabarnomalarni firibgarlar yuborayotganidan ogohlantirdi.
“Soliq qoʻmitasi nomidan yuborilgan ushbu xatlar firibgarlikning bir koʻrinishi ekanligi va soliq xizmatiga hech qanday aloqasi yoʻqligini maʼlum qilamiz”, deyiladi qoʻmita ogohlantirishida.
Qayd etilishicha, Soliq organlari soliq toʻlovchilarga elektron hujjatlarni faqat my.soliq.uz va my3.soliq.uz portalidagi shaxsiy kabinet orqali yuboradi. Hisoblangan soliqlar va qarzdorlik haqidagi barcha maʼlumotlar real vaqt rejimida shaxsiy kabinetda va Soliq mobil ilovasida mavjud.
Savollar yuzaga kelsa, soliq toʻlovchilar oʻzlariga biriktirilgan soliq inspektoriga murojaat qilishlari mumkin, uning aloqa maʼlumotlari shaxsiy kabinetida koʻrsatilgan.
Qoʻmita tasdiqlanmagan maʼlumotlar, shubhali havolalar, yuklamalar va ilova fayllaridan ehtiyot boʻlishga chaqirdi.
