Markaziy bank boshqaruvining qaroriga asosan quyidagi masʼuliyati cheklangan jamiyatlar mikromoliya tashkiloti faoliyatini amalga oshiruvchi tashkilotlar reyestriga kiritildi va hisob roʻyxatidan oʻtkazildi:
- “Milliy mikomoliya tashkiloti” MCHJ;
- “Asaka finance garant mikromoliya tashkiloti” MCHJ;
- “Xalq mikromoliya tashkiloti” MCHJ;
- “SQB mikromoliya tashkiloti” MCHJ;
- “Turon mikromoliya” MCHJ;
- “Biznesni rivojlantirish mikromoliya tashkiloti” MCHJ;
- “Aloqa Finance development mikromoliya tashkiloti” MCHJ;
- Microfinance Service MCHJ;
- Cash point MCHJ;
- “Almizan mikromoliya tashkiloti” MCHJ;
- “Tayan” MCHJ.
2024 yil dekabr oyida Shavkat Mirziyoyev kichik va oʻrta biznesga ajratiladigan kredit hajmini 120 trillion soʻmga yoki umumiy kredit portfelining 40 foizigacha oshirishni topshirgandi. Prezident kichik biznes hisobidan yirik loyihalarni kreditlash amaliyotini toʻxtatishga chaqirgan.
Shuningdek, mikromoliya va faktoring xizmatlariga talab ortgani taʼkidlangan edi — oʻtgan yili bu bozor hajmi 5,5 trillion soʻmga yetgan. Xususan, davlat banklari qoshida ushbu yoʻnalishda yangi boʻlimlar ochish va xorijiy investorlarni jalb qilish rejalashtirilgan edi, shunda bozor hajmini 10 trillion soʻmga yetkazish koʻzda tutilgan.
2024 yil yakunlariga koʻra, mikromoliyaviy kreditlash hajmi sezilarli darajada oshgan: mikrozaymlar 45,83 trillion soʻmga, mikrokreditlar esa 17,4 trillion soʻmga yetgan, bu esa oʻtgan yilga nisbatan 50 foizdan koʻproq oʻsish demakdir. Yilning ikkinchi yarmida mikrozaymlar hajmining oʻsish surʼati yanada tezlashgan va dekabr oyida 5,1 trillion soʻm bilan mutlaq rekord oʻrnatilgan.
