Toshkent shahrini energiya resurslari bilan taʼminlashni yaxshilash maqsadida Prezident tomonidan bir qator qoʻshimcha vazifalar belgilab berildi. Bu haqda Prezident matbuot xizmati xabar berdi.
Xususan,
- sanoat zonalari va yirik korxonalarda quyosh panellari oʻrnatish orqali 400 million kilovatt soat elektr chiqarish boʻyicha loyihalarni boshlash;
- ijtimoiy soha va davlat idoralari binolarida quyosh panellarini oʻrnatish hisobiga 75 million kilovatt soat elektr ishlab chiqarishni taʼminlash;
- Yuqori Chirchiq tumanida 500 megavattli yirik quyosh elektr stansiyasini qurish;
- poytaxtdagi sanoat korxonalarida elektr yoʻqotishlarini 1 foizga kamaytirish va energiya samaradorligini 3 foizga oshirish;
- 1817 ta koʻp qavatli uyning ichki isitish tizimini toʻliq yangilash;
- 300 kilometr magistral issiqlik tarmoqlarini yangilab, yoʻqotishlarni 5 foizga kamaytirish.
Umuman, shaharda qayta tiklanuvchi energiya joriy qilish uchun 1 milliard dollar yoʻnaltiriladi.
Avvalroq Toshkentda 2023 yili kutilayotgan 240 million kilovatt soatlik talab 4 baravar ortigʻi bilan, yaʼni 1 milliard 80 million kilovatt soat hajmda taʼminlanishi mumkinligi haqida xabar berilgandi.
