FTX kriptovalyuta birjasi asoschisi va sobiq bosh direktori 30 yoshli Sem Benkman-Frid 250 million dollar garov evaziga ozod qilindi. Bu haqda CNBC xabar berdi.
Qayd etilishicha, 22 dekabr, payshanba kuni Manxettendagi Federal sudda prokuror yordamchisi taʼkidlaganidek, bu AQSHda sudgacha boʻlgan bosqichda federal darajada eʼlon qilingan eng yirik garovdir. Garov oilaning mol-mulki, Benkman-Fridning ota-onasi va “katta” mol-mulki boʻlgan yana ikki shaxsning imzolari bilan taʼminlangan.
Bankrot boʻlgan FTX kriptovalyuta birjasi asoschisi ota-onasining Palo-Altodagi qarorgohida uy qamogʻida qoladi. 30 yoshli tadbirkorning navbatdagi sudi 3 yanvar kuni Nyu-Yorkda boʻlib oʻtadi.
Sem Benkman-Frid koʻplab firibgarlik jinoyatlarida ayblanmoqda. Uning sheriklari esa oʻz ayblarini allaqachon tan olgan. Xabarlarga koʻra, Benkman-Frid va uning sheriklari sabab kamida bir million mijoz oʻz mablagʻlaridan mahrum boʻldi.
