Адам Нейман 1979 йилда Исроилда туғилган. Унинг ота-онаси у 7 ёшга тўлганида ажрашган, шунинг учун у онаси билан кўп марта кўчиб юрган. 22 ёшига келиб у 13 та турли уйда яшашга улгурган.
Болалигида у бир муддат Исроилдаги киббуцда (мамлакат бўйлаб жойлашган жамоавий яшаш нуқталари) яшаган. У Ғазо сектори яқинида мактабга борган, онаси эса касалхонада шифокор бўлиб ишлаган.
Нейман оғир дислексия билан азият чеккан – у учинчи синфгача ўқиш ёки ёзишни билмаган. Мактабни битиргандан кейин, Нейман Исроил мудофаа армиясига хизматга кирган. У флотда беш йил хизмат қилган, гарчи Исроилда мажбурий ҳарбий хизмат муддати атиги уч йил бўлса ҳам.
«Мен айнан шу ерда кўплаб энг яқин дўстларимни топдим», – дея эслайди Нейман 2017 йилда Haaretz нашрига берган интервьюсида.
2001 йилда ҳарбий хизматдан сўнг, Адам Нейман Нью-Йоркка кўчиб ўтади ва у ерда опаси Ади билан бирга Трайбека микрорайонида яшайди. 2017 йилда у битирув маросимида чиқиш қилар экан, Нейман Нью-Йоркдаги илк кунларини клубларда ўтказгани ва «шаҳардаги ҳар бир қизнинг ортидан юргани» ҳақида очиқ-ойдин гапирган.
2002 йил январда, Нейман Барух коллежига ўқишга киради ва у ерда бизнес йўналишини танлайди.
Унинг сўзларига кўра, WeLive – жамоавий ётоқхоналар концепцияси ғояси айнан шу ерда пайдо бўлган. У бу лойиҳани коллеждаги тадбиркорлик танловига тақдим этган, бироқ иккинчи босқичдаёқ рад этилганди.
Унга танлов ҳайъати аъзоларидан бири шундай деган: «Сен одамларнинг яшаш тарзини ўзгартириш учун етарли маблағ йиға олмайсан».
Коллеждан кетиш ва оила қуриш
Адам Нейман коллежни битиришига бироз муддат қолганида ташлаб кетади. Бироқ 15 йил ўтиб, 2017 йилда у таълимни якунлайди ва битирув маросимида нутқ сўзлаш шарафига эга бўлади.
У айнан ўқиш давомида ўз бўлажак хотини – Ребекка Пэлтроу Нейман билан танишади.
Ребекка машҳур актриса Гвинет Пэлтроунинг аммаваччаси бўлиб, улар 2009 йилда турмуш қуришган. Ҳозирда эса беш нафар фарзанди бор.
Нейманнинг таъкидлашича, айни дамдаги муваффақиятида Ребекканинг ҳиссаси катта. Бизнесни ишга туширгандан кўп ўтмай, Нейман WeWork’нинг ҳаммуассиси бўлган Мигель Маккелви билан танишди. Улар умумий дўсти орқали учрашишади ва тезда умумий тил топишади, чунки иккаласида ҳам рақобат руҳи кучли эди. Маккелви Нейманни Egg Baby офисини ўзининг иш жойига, Бруклиндаги бинога кўчиришга кўндиради. Бир куни улар бўш турган офис хоналарини бошқа компанияларга ижарага бериш ғоясини муҳокама қилади. Шу тарзда WeWork’нинг концепцияси туғилади.
2008 йилда улар ўз мулкдорларини қўндиришга муваффақ бўлиб, Бруклиндаги қўшни бинодан бир қаватни ижарага олади. Натижада улар Green Desk номли биринчи коворкинг компаниясини ташкил қилади.
Бироқ Маккелви ва Нейман мустақил равишда ҳаракат қилишга қарорига келади. Улар Green Desk’даги улушларини ўз мулкдорларига 3 миллион доллар эвазига сотиб, 2010 йилда Нью-Йоркнинг Кичкина Италия (Little Italy) туманида биринчи WeWork майдонини очади.
Нейман раҳбарлик қилган пайтда WeWork жадал ўсишни бошлайди. Компаниянинг коворкинг майдонлари дунёнинг қарийб 40 та мамлакатидаги 120 дан ортиқ шаҳарда жойлашган эди. WeWork’нинг баҳоси эса 47 миллиард долларгача чиқади.
WeWork’нинг энг йирик сармоядорларидан бири Япониянинг SoftBank холдинги бўлиб, у компанияга 10 миллиард доллардан ортиқ инвестиция киритган. Нейман Business Insider нашрига берган интервьюсида SoftBank’нинг CEO’си Масаёси Сон билан яқин муносабатда бўлганини ва уни ҳазиломуз тарзда «Йода» деб аташини айтиб ўтганди.
Нейманнинг бойлиги энг юқори нуқтага етганида тахминан 4 миллиард долларга баҳоланган. WeWork’ни ташкил этганидан бери у бешта уй сотиб олиш учун 80 миллион доллардан ортиқ маблағ сарфлайди, шу жумладан, иккита уйни Нью-Йоркда, биттасини эса Ҳэмптонда харид қилади. 2018 йилда у Сан-Франциско атрофида 1200 квадрат метрлик катта ҳовли сотиб олгани ва унда гитара шаклидаги махсус хона мавжудлиги ҳақида хабарлар тарқалган. Бу уйнинг баҳоси 21 миллион доллар эди.
Нейман шахсан ҳам, WeWork номидан ҳам бир неча стартапларга сармоя киритади. Унинг диққатини сунъий тўлқин ҳосил қилувчи бассейнлар ишлаб чиқарувчи компания, тиббий марихуана етказиб берувчи стартап ва «суперфудлар» ишлаб чиқарувчи компания тортганди. Охирги стартап эса самарадорликни ошириш учун мўлжалланган қўзиқоринлар, лавлаги ва зирдан тайёрланган кокос суви кукуни ҳамда кофеин миқдори юқори бўлган кофе маҳсулотларини сотган.
Нейман WeWork’нинг энг йирик акциядорларидан бири эди. Бироқ, у ўз улушининг бир қисмини нақд пулга айлантирган ва кредитлар олган. Унинг акция савдолари ва қарз операциялари умумий ҳисобда 700 миллион долларни ташкил этган.
Компания ўз IPO’си учун расман 2019 йил 14 август куни ариза топширади. Бу орқали кенг жамоатчилик компаниянинг молиявий кўрсаткичларидан хабар топади: 2018 йилда WeWork’нинг даромади 1,8 миллиард доллар бўлган бўлса, зарарлари 1,6 миллиард долларга етган эди.
Business Insider таҳлилига кўра, WeWork’нинг IPO учун тақдим этган S-1 шаклидаги ҳужжати компаниянинг молиявий ҳолати ҳақида муҳим маълумотларни очиқлаган. Журналистлар шундай ёзган эди:
- «Охирги уч йил ичида зарарлар кескин ошганини рақамлар кўрсатиб турибди;
- 2016 йилда WeWork 436 миллион доллар даромад олган, бироқ 429 миллион доллар зарарга учраган;
- 2017 йилда зарар 890 миллион долларга етган, бу вақтда компаниянинг даромади 886 миллион доллар бўлган;
- 2018 йилда эса зарар 1,6 миллиард долларга ўсган, даромад эса 1,8 миллиард долларни ташкил қилган;
- 2019 йилнинг биринчи ярмида компания 1,5 миллиард доллар даромад қилган, лекин 690 миллион доллар зарар кўрган;
- We Co. Uber’дан кейин бозорга чиқадиган энг қимматбаҳо стартап бўлиши кутилмоқда».
Бироқ, WeWork’нинг бизнеси чуқурроқ ўрганилган сари, компания фаолияти билан боғлиқ баҳсли масалалар пайдо бўла бошлайди. Ҳужжатлардан маълум бўлишича, WeWork 2019 йил январь ойида ўз номини We Company’га ўзгартириш учун We сўзига бўлган товар белгиси ҳуқуқларини Адам Неймандан сотиб олган. Бу ҳуқуқлар учун у компаниядан қарийб 6 миллион доллар олган. Ҳодиса танқидларга учрагач, Нейман пулларни қайтариб беради.
IPO ҳужжатлари Адам Нейман ва WeWork ўртасидаги эҳтимолий манфаатлар тўқнашуви ҳақидаги маълумотларни ҳам ошкор қилади. Хусусан, Нейман шахсан WeWork ижарага олган бинолар билан молиявий алоқаларга эга бўлган. Шунингдек, унинг рафиқаси Ребекка компания бош директори лавозими бўшаган тақдирда, унинг ўрнига янги раҳбарни танлайдиган уч кишидан бири бўлиши керак эди.
WeWork бу ваколатларни чеклайди: Ребекка Нейманга янги CEO танлашда иштирок этиш тақиқланади. Бундан ташқари, у ва Нейман оиласининг бирон бир аъзоси компаниянинг директорлар кенгашига кириши мумкин эмас деган қарор қабул қилинади.
IPO ҳужжатлари орқали маълум бўладики, WeWork’да ходимларни бошқариш бўйича масъул шахслар тез-тез ўзгариб турган. Баъзилар бунинг сабабини айнан Адам Нейманнинг раҳбарлик услуби билан боғлаган. У компания ходимларидан баъзиларини орқасидан «Иккинчи даражали ўйинчилар» деб атагани ҳақида миш-мишлар тарқалган.
Шунингдек, ҳужжатлар Нейманнинг WeWork’даги ҳокимияти қанчалик кучли эканини ҳам кўрсатади. Унинг махсус акциялари ҳар бир акцияга 20 овоз ҳуқуқини берарди, яъни компания устида тўлиқ назоратга эга эди. IPO ҳужжатларига ўзгартириш киритилгандан сўнг, унинг ҳокимияти чекланади ва компания баҳоси 47 миллиард доллардан 20 миллиард долларга туширилади.
2019 йил сентябрда The Wall Street Journal’нинг репортажида Нейманнинг ҳаддан ташқари дабдабали ҳаёти ҳақида батафсил ёзилган эди. Унинг наркотик моддалар ва спиртли ичимликлар иштирокида ўтган катта кечалари ҳақидаги икки воқеа энг шов-шувли бўлган:
ишдан бўшатишлар ҳақидаги эълондан сўнг Нейман ходимларга текила тарқатиб, Run-DMC хип-хоп гуруҳининг кутилмаган концертини ташкил қилади;
шахсий самолёти Исроилда ушлаб қолинади, чунки бортдаги жавондан, корнфлекс қутиси ичида марихуана топилганди;
Бу танқидлар туфайли Нейманнинг WeWork’ни бошқаришга лаёқати шубҳа остига қўйилади. 2019 йил сентябрда компания директорлар кенгаши уни лавозимидан четлатишни муҳокама қилади, бу ташаббусни SoftBank раҳбари Масаеси Сон ҳам қўллаб-қувватлайди.
Ниҳоят, 24 сентябрь куни Нейман CEO лавозимидан кетишини эълон қилади. Унинг ўрнига Себастьян Ганнингем ва Арти Минсон CEO сифатида тайинланади. Кўп ўтмай, WeWork IPO аризасини қайтариб олиб, жамоатчиликка чиқиш режасини номаълум муддатга қолдиради.
Нейман камида иккита кўчмас мулкини сотувга қўйди — Нью-Йоркдаги уч қаватли пентхаус ва Хэмптонсдаги уйини (1,25 миллон долларга 2020 йил мартда сотган).
У вақтинча WeWork директорлар кенгаши раиси лавозимини сақлаб қолади, лекин 2019 йил октябрда ундан ҳам воз кечади. Компанияни қутқариш режаси доирасида SoftBank — WeWork’нинг энг йирик инвестори — стартап устида тўлиқ назоратни қўлга олади. Бу келишувга кўра, SoftBank Нейманга 1,7 миллиард долларлик акция пакетини беришни режалаштирган.
Бироқ 2020 йил апрелда SoftBank бу режанинг катта қисмини бажаришдан бош тортади. У 3 миллиард долларга тенг акцияларни сотиб олишни, жумладан, Нейманнинг 970 миллион долларлик акцияларини ҳам харид қилишни кўзлаган эди. Аммо компания «WeWork’га қарши кўплаб янги ва жиддий фуқаролик ҳамда жиноий терговлар» туфайли бу келишувдан воз кечади.
Нейман икки йил давомида оммавий чиқишлар қилмайди. 2021 йил ноябрда Эндрю Росс Соркин ундан интервью олади. Суҳбат давомида унга минглаб ходимлар ишдан бўшатилгани, IPO муваффақиятсиз тугагани ва We товар белгисини сотгани ҳақида саволлар берилади.
Нейман WeWork баҳоси тушиб кетганидан афсусланишини айтган, аммо ишдан бўшатилган ходимлардан кечирим сўрашдан бош тортганди. У компаниядан кетганида SoftBank унга 180 миллион доллар бергани ҳақида ҳам гапирганди.
Кўп ўтмай Нейман яна стартаплар оламига қайтади. У Flow номли ижара уй-жой компаниясини ташкил қилади ва A16z (Andreessen Horowitz) унга 350 миллион доллар сармоя киритади. Бу фонд тарихидаги энг катта ягона инвестиция бўлади.
