Tesla kelasi hafta Meksikada elektromobillar ishlab chiqaruvchi zavod qurilishini eʼlon qiladi. Bu haqda Bloomberg xabar berdi.
Qayd etilishicha, zavod Nuevo-Leon shtatining Monterrey shahrida quriladi. Bu kompaniyaning Amerika Qoʻshma Shtatlaridan tashqarida joylashgan birinchi Shimoliy Amerika obyekti boʻladi.
Meksikadagi zavod Ostin, Berlin va Shanxaydagi zavodlarni oʻz ichiga olgan global ishlab chiqarishni kengaytirish dasturining bir qismi boʻladi. Zavodning ishga tushirilish vaqti va u qanday modellarni ishlab chiqarishi haqidagi maʼlumotlar ham yaqin kunlarda eʼlon qilinadi.
Meksikada ishlab chiqarilgan elektr transport vositalari AQSHning Inflyatsiyani pasaytirish toʻgʻrisidagi qonuniga muvofiq soliq imtiyozlariga ega boʻlishi mumkin. Qonun avgust oyida qabul qilingan va Shimoliy Amerikada yigʻilgan elektr transport vositalarini sotib olish uchun soliq subsidiyalarini nazarda tutadi. Imtiyoz faqat Amerika komponentlari yordamida ishlab chiqarilgan batareyali elektr transport vositalariga tegishli.
Avvalroq Tesla egasi Ilon Mask 2030 yilgacha har yili 20 million elektromobil sotish maqsadini eʼlon qilgan edi.
