Yandex Go машиналар тезлигини мониторинг қилиш хизматини ишга туширди. Бу ҳақда компания «Gazeta.uz»га хабар берди.
Маълум бўлишича, тизим машина тезлиги ошиб кетса, илова орқали ҳайдовчини бу ҳақда огоҳлантиради. Бир нечта огоҳлантиришдан кейин эса, ҳайдовчининг буюртмаларни қабул қилиш имконияти вақтинча чекланади.
Қайд этилишича, бу компаниянинг ўз ишланмаси бўлиб, мониторинг сервис мавжуд бўлган барча етти шаҳарда ишлайди. Технология ҳайдовчининг ҳаракат тезлигини аниқлаш учун GPS’дан фойдаланади. Мазкур тезлик маршрутларни қуриш учун ишлатиладиган навигатор бўйича шу йўл кесимида рухсат этилган максимал тезлик билан таққосланади.
«Биз Ўзбекистон шаҳарларида хавфсизликни таъминлашга катта эътибор қаратамиз. Янги технология ҳайдовчиларга белгиланган тезликни назорат қилиш ва йўл-транспорт ҳодисалари хавфини камайтиришга ёрдам беради. Бошқа мамлакатларда аввал тезликни ошириб юрган ҳайдовчиларнинг 70 фоиздан ортиғи тизимдаги иккинчи хабарномадан сўнг уни пасайтирганини кўрдик», — деган Yandex Go компаниясининг Марказий Осиё бозорини ривожлантириш бўйича ижрочи директори Тамирлан Шапиев.
Эслатиб ўтамиз, «Яндекс.Такси» 2018 йил апрель ойида Тошкентда ишга туширилган ва у ҳозирда пойтахтдан ташқари Фарғона, Наманган Андижон, Қўқон, Марғилон, Бухоро ва Самарқандда ҳам хизмат кўрсатади.
