Oʻzbekistonda “Davlat qarzi toʻgʻrisida”gi qonun bilan qarz summasining yalpi ichki mahsulotga nisbatan eng yuqori miqdori 60 foizdan oshmasligi belgilanmoqda. Senatning Byudjet va iqtisodiy islohotlar masalalari qoʻmitasining yalpi majlis oldidan qoʻmita yigʻilishida ushbu qonun dastalbki tarzda koʻrib chiqildi.
Qayd etilishicha, ushbu qonunni ishlab chiqishda davlat qarzini boshqarishda parlament va jamoatchilik nazoratini oʻrnatish boʻyicha samarali yaxlit tizimni yaratishga eʼtibor qaratilgan.
Qonun bilan davlat qarzi summasining yalpi ichki mahsulotga nisbatan eng yuqori miqdori 60 foizdan oshmasligi, davlat qarzi hisobidan faqat ijtimoiy va infratuzilma loyihalarini moliyalashtirish mumkinligi belgilanmoqda.
Senatorlarning taʼkidlashicha, “Davlat qarzi toʻgʻrisida”gi qonun bilan davlat qarzi va unga xizmat koʻrsatish xarajatlarining ustuvorligi, davlat qarzining cheklangan hajmlari, davlat hokimiyati va boshqaruv organlarining davlat qarzini boshqarishdagi vakolatlarni belgilash nazarda tutilgan.
Qonun normalariga muvofiq, davlat qarzini boshqarish sohasidagi Oʻzbekiston Prezidenti, Oliy Majlis palatalari, Hisob palatasi, Vazirlar Mahkamasi, Markaziy bank va Moliya vazirligining vakolatlari belgilanmoqda.
Xususan, Moliya vazirligi davlat qarzini boshqarish boʻyicha vakolatli organ etib belgilab qoʻyiladi.
Maʼlumot uchun, Oʻzbekistonning davlat qarzi qoldigʻi 2022 yilning 1 yanvar holatiga 26,3 milliard dollarni tashkil etmoqda.
Oʻzbekistonning umumiy tashqi qarzi esa 2022 yil 1 yanvar holatiga 39,6 milliard dollarni (2021 yilning 1 yanvar holatiga 34,2 milliard dollar) tashkil qilgan.
Mamlakatning umumiy davlat qarzi 2022 yil yakunida 31,1 milliard dollar miqdorida (YAIMga nisbatan 42 foiz) boʻlishi prognoz qilinmoqda.
