Буюк Британиянинг спорт автомобиллари ишлаб чиқарувчиси Aston Martin Lagonda Global Holdings Plc акцияларини Саудия Арабистони суверен жамғармаси ва ҳозирги инвесторларига сотиш орқали 653 миллион фунт стерлинг (772 миллион доллар) миқдорида маблағ йиғaди. Бу ҳақда Interfax нашри хабар берди.
«Компания йиғилган маблағдан қарзларни камайтириш ва бизнесни ривожлантиришга сармоя киритиш мақсадида фойдаланмоқчи», дея маълум қилган Aston Martin Лондон фонд биржасига берган баёнотида.
Компания Саудия давлат инвестиция фондига ҳар бири 3,35 фунт стерлинг бўлган 23,3 миллион дона янги акцияларни сотади. Бу 14 июлда, қимматли қоғозлар бозори ёпилишидаги нархдан 9,8 фоизга паст.
Ушбу сотув компанияга 78 миллион фунт стерлинг маблағ жалб қилиш имконини беради.
Бундан ташқари, Саудия давлат инвестиция фонди Aston Martin’нинг амалдаги акциядорлари орасида бўлиб ўтувчи, қиймати 575 миллион фунт стерлинг бўлган кейинги акциялар савдосида ҳам иштирок этади.
«Натижада Саудия давлат инвестиция фонди Aston Martin компаниясининг 16,7 фоиз улушига эгалик қилади ва янги тиргак инвестор (хусусий капитал ёки венчур капитал фонди томонидан жалб қилинган, капиталга биринчи бўлиб катта миқдорда нақд пул қўшган ва шу билан бошқа инвесторларда ҳам ишонч ҳосил қилган шахс ёки ташкилот), шунингдек, компаниянинг иккинчи йирик акциядорига айланади», дейилади компания баёнотида.
Aston Martin ўз баёнотида компания натижалари кутилганига тўғри келиши ва шу сабаб 2022 йил учун прогнозлари ўзгаришсиз қолаётганини қайд этган.
Лондон савдоларида 15 июль куни Aston Martin акциялари йигирма бир фоизга қимматлади. Жорий йил бошидан буён эса уларнинг нархи 67 фоизга арзонлаган.
