Sirdaryo viloyatida faoliyat yurituvchi Globus MCHJ Guliston shahar hokimligining xatti-harakatidan norozi boʻlib Biznes-ombudsmanga murojaat qildi. Bu haqda vakilning matbuot xizmati xabar berdi.
Maʼlum boʻlishicha, korxonaga Guliston shahar hokimining 2017 yildagi qaroriga asosan 1, 343 gektar yer maydoni ajratilgan. Ushbu hududda avtomobillarga texnik xizmat koʻrsatish shaxobchasi faoliyati yoʻlga qoʻyilgan edi.
Shahar hokimining 2021 yildagi qarori bilan mazkur hudud buzilish hududiga tushgan, ammo tadbirkorga kompensatsiya toʻlovlari toʻliq amalga oshirilmagan. Taʼkidlanishicha, tadbirkorga tegishli mulk mustaqil baholaydigan korxona tomonidan 2,9 milliard soʻmga baholangan.
Ushbu holat yuzasidan Biznes-ombudsman tomonidan Guliston tumanlararo iqtisodiy sudiga daʼvo ariza kiritilgan. Shundan soʻng sud qarori bilan Guliston shahar hokimligiga Globus MCHJga 2,7 milliard soʻm kompensatsiya toʻlab berish vazifasi yuklatildi.
