Япониянинг Nissan компанияси 1 апрелдан бошланадиган молиявий йилнинг биринчи ярми учун Россияда автомобиль ишлаб чиқаришни тўхтатишга қарор қилди. Бу ҳақда Reuters компания бош директори Макото Учиданинг баёнотига таяниб хабар бермоқда.
Санкт-Петербургдаги Nissan ва Toyota автомобиль заводларида март ойида ишлаб чиқариш тўхтаб қолганди.
«Россияга қарши санкциялар туфайли бутловчи қисмларни етказиб беришдаги узилишларнинг ишга таъсирини минималлаштириш чораларини кўрамиз», — деди Учида.
Шаҳар губернатори Александр Бегловнинг сўзларига кўра, бутловчи қисмлар ва жиҳозларни етказиб бериш тикланганидан кейин ишлаб чиқариш ҳам қайта йўлга қўйилади.
Губернаторнинг таъкидлашича, Санкт-Петербург ҳокимияти корхоналарнинг топ-менежерлари билан ҳамкорлик қилади ва «исталган вақтда керакли ёрдамни кўрсатишга тайёр».
Nissan Санкт-Петербургдаги заводда Qashqai, X-Trail ва Murano йўлтанламасларини йиғади. Завод ишни март ойида, Украинага ҳужум бошланганидан ва Россияга қарши лик санкциялардан кўп ўтмай тўхтатган эди.
Nissan бош директори Макото Учида май ойида компаниянинг Санкт-Петербургдаги заводи 2022 йилда қайта очилмаслиги мумкинлигини айтганди.
Аввалроқ Франциянинг Renault автомобиль ишлаб чиқарувчисининг Россиядаги активлари давлат мулкига айланиши маълум бўлганди.
