Президентнинг «Иқтисодиётда давлат иштирокини янада қисқартириш ва хусусийлаштиришни жадаллаштиришга оид қўшимча чора-тадбирлар тўғрисида»ги қарорида 2023 йил 1 апрелга қадар Universal Mobile Systems МЧЖ хусусийлаштирилиши белгилаб қўйилганди. Давлат активларини бошқариш агентлиги ушбу жараённи бошлади.
Давактив тегишли хусусийлаштириш дастурларига мувофиқ, Universal Mobile Systems МЧЖни хусусийлаштириш бўйича профессионал консалтинг компанияси танлаб олиниши юзасидан танлов эълон қилди.
Барча қизиқиш билдирган талабгорлардан таклиф тақдим этиш учун сўровномага (RfP) асосан тижорат таклифларини 2022 йил 4 июль куни соат 18:00 (Тошкент вақти билан)га қадар тақдим этиш сўралган.
Актив тўғрисида қисқача маълумот
Universal Mobile Systems МЧЖ (UMS МЧЖ, Mobiuz савдо белгиси остида) — Mobiuz савдо белгиси остида 4G LTE, UMTS va GSM стандартлари асосида замонавий мобил овозли алоқа ва мобил интернетга уланиш хизматларини тақдим этувчи Ўзбекистондаги телекоммуникация компанияси.
UMS МЧЖнинг марказий офиси Тошкент шаҳри, Амир Темур ҳиёбони, 24-уйда жойлашган. Мобил оператор 2014 йилдан тижорат фаолиятини бошлаган. 2021 йил якунига кўра, компания 1 триллион 133 миллиард сўм соф тушум, 96,5 миллиард сўм соф фойда олган. Умумий соф актив қиймати 1,4 триллион сўмга тенг.
Компаниянинг абонементлар сони 1 май ҳолатига 6,6 миллион нафарга етган.
