АҚШ президенти Жо Байден маъмурияти электромобиллар учун аккумуляторлар ишлаб чиқаришга 3 миллиард доллар ажратишни режалаштирган. Бу ҳақда NBC News ёзмоқда.
Оқ уй АҚШнинг хорижий аккумуляторларга қарамлигини камайтириш учун электромобиль аккумуляторларини етказиб бериш занжирида иштирок этувчи америкалик компанияларни молиялаштирмоқчи.
Байден 2030 йилга бориб электр транспорт воситалари АҚШ бозоридаги сотувларнинг ярмини ташкил этишини мақсад қилган. Инфратузилма тўғрисидаги қонун, шунингдек, Америка заряд станциялари тармоғини ривожлантиришни ҳам назарда тутади.
Грантлар, шунингдек, аккумулятор материаллари, эски батареяларни қайта ишловчи ёки саноат билан шуғулланадиган корпорациялар учун ҳам мавжуд бўлади.
Аввалроқ Байден АҚШда аккумуляторлар ва электромобиллар ишлаб чиқаришда асосий аҳамиятга эга бўлган фойдали қазилмаларни қазиб олишни ривожлантириш учун махсус ваколатлардан фойдаланиш имкониятларини кўриб чиқишни бошлаган эди.
