Ўзбекистонда ҳудудлар кесимида турар-жой нархларининг энг юқори ўсиш суръати Сурхондарёда кузатилди. Бу ҳақда Иқтисодий тадқиқотлар ва ислоҳотлар маркази томонидан Ўзбекистон кўчмас мулк бозоридаги тенденциялар таҳлилида сўз боради.
Марказ ҳисоб-китобларига кўра, март ойида иккиламчи бозорда уй-жой ўртача нархлари ўтган ойга нисбатан 1,9 фоизга пасайган (февраль ойида ўсиш 1,7 фоизни ташкил этган эди).
Ҳудудлар кесимида турар-жой нархларининг энг юқори ўсиш суръатлари Сурхондарё (6 фоиз), Тошкент шаҳри (2,4 фоиз) кузатилган бўлса, Сирдарё (-11,6 фоиз), Андижон (-7,6 фоиз) ва Наманган (-5,4 фоиз) вилоятларида нархларнинг пасайиши қайд этилди.
Мутахассисларнинг таъкидлашича, давлатнинг уй-жой дастурлари кўчмас мулк бозорида таклиф ўсишини, шунингдек фуқароларнинг уй-жой сотиб олиш қобилиятини қўллаб-қувватлашда давом этмоқда.
Аввалроқ Ўзбекистонда боғдорчилик-узумчилик ширкатлари биноларини турар-жой тоифасига ўтказишга рухсат берилганди.
