Rossiyaning Broniboy yetkazib berish xizmati Oʻzbekiston bozoriga kiradi. Bu haqda kompaniya matbuot xizmati xabar berdi.
Maʼlum qilinishicha, Toshkentdagi Broniboyʻga 50 dan ortiq hamkorlar ulangan. Kompaniya restoranlar, doʻkonlar va dorixonalardan buyurtma yetkazib berishga ixtisoslashgan.
Broniboy yetkazib berish xizmati Oʻzbekiston boʻylab restoranlardan oziq-ovqat, doʻkonlar, dorixonalar va gul doʻkonlaridan tovarlar yetkazib berishga eʼtibor qaratadi. Bundan tashqari, kompaniya elektron tijorat, jumladan, oziq-ovqat yetkazib berish agregatorlari, oʻz yetkazib berish xizmatlariga ega restoranlar va onlayn-doʻkonlar uchun kuryerlarni tayyorlaydi va boshqaradi.
Broniboy Oʻzbekistonda ishga tushirish uchun 50 ming dollarga yaqin sarmoya kiritgan. Maʼlumotlarga koʻra, kompaniya 2022 yil oxirigacha oʻzini-oʻzi taʼminlash darajasiga yetishi kerak. Xizmat Toshkentda sinovdan oʻtkazishni yakunladi: shaharda kuryerlarni tayyorlash va oʻqitish markazi faoliyat koʻrsatmoqda.
Broniboy 2022 yil oxiriga qadar Samarqand va Buxoroda ish boshlash, 500 dan ortiq hamkorlarni ulash va kuniga 4 mingdan ortiq buyurtmani bajarishni rejalashtirgan.
Broniboy 2017 yilda tashkil etilgan. Xizmat Rossiyaning 17 ta shahrida, jumladan Krasnodar (shahardagi buyurtmalar soni boʻyicha birinchi oʻrinda), Moskva, Yekaterinburg, Qozon, Novosibirsk va Rostov-Donda faoliyat olib boradi.
Avvalroq Habib Nurmagomedov Oʻzbekistonda fast-fud restorani ochishi xabar qilingandi.
