NASA янги йирик Space Launch System (SLS) ракетасини синов тариқасида учиришни режалаштирмоқда. Бу ҳақда The Verge ёзмоқда.
Маълум қилинишича, бу синов ракетанинг ёзда амалга ошириладиган асосий учирилишидан олдин ўтиши керак бўлган охирги парвоз олди синовларидан биридир.
SLS’нинг мақсади одамлар ва юкларни узоқ космосга ташишдан иборат. У 2020 йилларнинг ўрталарида Ойга биринчи аёл ва биринчи афро-америкалик жўнатилиши режалаштирилаётган NASA Artemis дастурида етакчи роль ўйнаши керак.
Ташувчи ракета 60 минг фунтгача юкни кўтара олади. SLS NASA астронавтларини Ой юзасига олиб чиқадиган Orion капсуласини учириш учун мўлжалланган.
Ойга учирилишидан олдин ракета синовдан ўтказилиши керак: Orion 4–6 ҳафталик қисқа миссияга экипаж аъзоларисиз юборилади. Бу вақт ичида ракета Ой атрофида учиши керак бўлади.
Ушбу синовга деярли ўн йил давомида тайёргарлик кўрилмоқда: NASA ва Boeing SLS устида 2010 йилларнинг бошидан бери ишламоқда. Ниҳоят, 17 март куни SLS ракетаси қурилиш ангаридан чиқиб, учиришга тўлиқ тайёрланди ва Флоридадаги Кеннеди космик марказидаги учириш майдончасига йўл олди. LC-39B деб номланган учириш майдончаси «Аполлон»нинг тарихий учирилиши, шунингдек, бир нечта космик кемаларни учириш учун ишлатилган.
Ракетанинг учирилиши 3 апрель куни, SLS резервуарлари криоген суюқ кислород ва суюқ водород билан тўлдирилгандан сўнг амалга оширилади. SLS ракетасининг жонли трансляциялари NASA’нинг YouTube каналларидан бирида эфирга узатилади.
Аввалроқ NASA биринчи марта бошқа сайёрадан ракета учириши хабар қилинганди. Шунингдек, NASA Жефф Безоснинг космик компанияси билан шартнома имзолагани ҳақида хабар берилди.
