Каспий қувурлар консорциумида апрель ойи охиригача давом этадиган таъмирлаш ишлари шароитида нефть қазиб олиш ҳажми кунига 320 минг баррелгача қисқариши мумкин. Бу ҳақда Қозоғистон Энергетика вазирлиги маълум қилди.
Таъкидланишича, 2022 йилнинг апрель ойи охиригача бўлган таъмирлаш даврида нефть қазиб олиш 1,3 миллион тоннага қисқаради.
«Ушбу қисқартириш ОПЕК+’даги ҳамкорлар билан ўзаро ҳамкорлик доирасидаги компенсация режасининг бир қисми сифатида кўриб чиқилади», дейилади вазирлик хабарида.
Каспий қувурлар консорциуми (КҚК) — бу Россия, Қозоғистон ва дунёнинг бошқа мамлакатларидаги етакчи нефть компаниялари иштирокидаги халқаро нефтни ташиш лойиҳаси. У Каспий магистраль нефть қувурини қуриш ва ишлатиш учун яратилган.
Асосан Ғарбий Қозоғистонда жойлашган конлардан олинадиган нефть, шунингдек, Россия компанияларининг хом ашёси ундан келади. Нефть Новороссийск областининг бир қисми бўлган Южная Озереевка қишлоғидаги денгиз терминалига ташилади ва у ерда жаҳон бозорларига жўнатиш учун танкерларга юкланади.
КҚК 22 март куни Новороссийск яқинидаги терминалда учта масофавий боғланиш блокидан иккитасининг ишини тўхтатди, чунки ВПУ-2 ички гильзасининг иккита шланги бўрон туфайли шикастланганди. Компания ушбу зарарларни жиддий деб атади ва улар қурилманинг хавфсиз ишлашига имкон бермаслигини таъкидлади. Бундан ташқари, ВПУ-3 сузувчи шлангларидан бирининг қувват рамкаси алмаштирилди.
Қайд этилишича, таъмирлаш муддати бир ярим ойдан икки ойгача чўзилиши мумкин.
«Қайта тиклаш ишларининг бундай давом этиши билан юк ташишнинг 80 фоизигача, яъни кунига 1 миллион баррелгача бўлган потенциал йўқотилиши мумкин», — деди Россия энергетика вазири ўринбосари Павел Сорокин.
Orda порталининг хабар беришича, Қозоғистон миллий иқтисодиёт вазири Алибек Куантиров таъмирлаш икки-уч ҳафта давом этишини айтган.
«Нефть нархининг ошиши сабабли барибир фойдада қоламиз», — деди вазир ва мамлакат бюджети қайта ҳисоб-китоб қилинишини таъкидлади.
Аввалроқ Қозоғистон Ўзбекистон учун Каспий денгизидаги портни очгани хабар қилинганди. Шунингдек, Қозоғистон энергетика вазири республикада АЭС қурилишини қўллаб-қувватлагани ҳақида хабар берилди.
