Ўзбекистонда ишбилармонлик фаоллиги индекси февраль ойида 85 пунктга ошди. Бу ҳақда Иқтисодий тадқиқотлар ва ислоҳотлар маркази Kommers.uz’га маълум қилди.
Маълум қилинишича, марказ томонидан баҳоланган Ишбилармонлик фаоллиги индекси (ИФИ) 2022 йил февраль ойида 1085 бирликни ташкил этиб, январь ойига нисбатан 8,5 фоизга ошган. Шунингдек, ишбилармонлик фаоллиги индекси 2021 йилнинг мос даврига нисбатан эса 33 фоизлик ўсиш қайд этилди.
Шунингдек, 2022 йилнинг февраль ойида Ишбилармонлик фаоллиги индекси январь ойига нисбатан 8,5 фоизга ошиб, 1085 бирликни ташкил этиши, қуйидаги компонентлар даражасидаги ўзгаришларга боғлиқ бўлган:
- хўжалик юритувчи субъектларнинг банк ҳисобварақаларидаги операциялар сони 16,5 фоизга ошган;
- фаолият кўрсатаётган хўжалик юритувчи субъектлар бўйича компонент 2,9 фоизга ошган;
- товар-хом ашё биржасида хом ашё сотиб олиш жадаллиги 6,0 фоизга ошган;
- товар белгилари бўйича компонент 9,6 фоизга камайган.
Қайд этилишича, 2022 йил февраль ойида ИФИ 12 та ҳудудда ўтган ойга (2022 йил январь) нисбатан ўсиш кузатилган. Хоразм (70,4 фоиз), Наманган (46,9 фоиз), Сурхондарё (46,0 фоиз) ва Жиззах (23,7 фоиз) вилоятларида сезиларли даражада ўсиш кузатилган.
Шу билан бирга, ушбу индекс 2 та ҳудудда камайган. Хусусан, Тошкент (-1,9 фоиз) ва Андижон (-0,7 фоиз) вилоятларида ўтган ойга нисбатан пасайиш кузатилган.
Банк ҳисоб варақлари бўйича операциялар
Хабарга кўра, 2022 йил февраль ойида банклараро тўлов операциялари сони 4 миллион 964,6 минг тани ташкил этди ва 2022 йилнинг январь ойига нисбатан 703,6 минг транзакцияга (16,5 фоиз) ошган.
Банклараро тўлов операциялари сони барча ҳудудларда ошган. Жумладан, 2022 йил февралда республиканинг барча ҳудудларида юридик шахслар ўртасидаги банк операциялари сони ўтган ойга нисбатан ошган. Хусусан, сезиларли даражадаги ўсиш Навоий (23,1 фоиз), Қашқадарё (19,5 фоиз), Самарқанд (19,3 фоиз) вилоятларида ва Тошкент шаҳрида (18,7 фоиз) кузатилган.
Товар-хом ашё биржасидаги фаоллик
Маълумотларга кўра, 2022 йилнинг февраль ойида ИФИнинг биржа компоненти 1 миллион 599 бирликни ташкил этди. Бу эса ушбу компонентнинг ўтган ойга нисбатан 6,0 фоизга ўсганлигини англатиб, битимлар сонининг (9,6 фоиз) ошганлиги билан изоҳланади.
Республика товар-хом ашё биржасида товарлар савдоси умумий айланмаси ҳажми 2022 йил февраль ойида 6 триллион 273,6 млрд. сўмни ташкил этиб, ушбу кўрсаткич ўтган ойга нисбатан 14,4 фоизга ошган.
Хўжалик юритувчи субъектларнинг фаоллиги
Фаолият юритаётган хўжалик субъектлари бўйича компонент 2022 йил февраль ойида 1 миллион 291 бирликни ташкил этиб, ўтган ойга нисбатан 2,9 фоизга ошганлигини кўрсатади. Ушбу кўрсаткич 2021 йилнинг мос даврига нисбатан ижобий ўзгариб, 9,6 фоизга ошган.
Шунингдек, 2022 йил февраль ойида барча турдаги фаолият юритаётган хўжалик юритувчи субъектлар сони 2022 йилнинг январь ойига (577 миллион 914 бирлик) нисбатан 3861 тага кўпайиб, 581 миллион 775 бирликни ташкил этган.
Ҳисобот даврида, кичик корхоналар сони 467 миллион 96 тадан 470 миллион 712 тагача ошган (ўсиш 3616 та). Фермер хўжаликлари сони 107 миллион 751 тадан 107 миллион 710 тагача (пасайиш 41 та) камайган. Йирик тадбиркорлик билан шуғулланаётган субъектлар сони 3353 тани ташкил этиб, 2022 йилнинг январь ойига нисбатан 286 тага ошган.
Брендларни рўйхатга олиш
Маълум қилинишича, 2022 йил февраль ойида савдо белгилари муҳофазаси бўйича бизнес фаоллиги индекси 0,9043 бирликни ташкил этиб, ушбу кўрсаткич 2022 йилнинг январь ойига нисбатан 9,6 фоизга камайган. 2022 йилнинг февраль ойида юридик шахслар томонидан 312 та товар белгилари ва товар номлари рўйхатга олинган.
Аввалроқ Ўзбекистонда сўнгги икки ойдаги солиқ тушумлари ҳажми салкам 21 фоизга ошгани хабар қилинганди. Шунингдек, 2022 йилнинг февраль ойида ишбилармонлик муҳитининг умумий кўрсаткичи январь ойига нисбатан 1 пунктга ошгани ҳақида хабар берилди.
