Oʻzbekiston 2022 yilning yanvar-fevral oylarida salkam 114 million dollarlik meva va sabzavotlar eksport qildi. Bu haqda Davlat statistika qoʻmitasi matbuot xizmati xabar berdi.
Dastlabki maʼlumotlarga koʻra, yanvar-fevral oylarida Oʻzbekiston qiymati 113,7 million dollarga teng boʻlgan 164 ming tonna meva va sabzavotlar eksport qilgan. Bu koʻrsatkich 2021 yilning mos davri bilan solishtirilganda 33 ming tonnaga oshgan.
Qayd etilishicha, yanvar-fevral oylarida eksport qilingan meva va sabzavotlar hajmi quyidagicha:
- meva va rezavorlar — 19,2 ming tonna;
- quritilgan meva va rezavorlar — 8,7 ming tonna;
- sabzavotlar — 100,4 ming tonna;
- qalampir — 2,6 ming tonna;
- pomidor — 12,5 ming tonna;
- uzum — 9,5 ming tonna;
- mayiz — 15,2 ming tonna;
- yeryongʻoq — 4,2 ming tonna;
- tarvuz-qovun — 337 tonna.
Avvalroq Oʻzbekistondagi eng koʻp meva-sabzavot eksport qilayotgan hududlar xabar qilingandi. Shuningdek, qishloq xoʻjaligi yerlaridan foydalanuvchilarga har bir gektar maydon uchun subsidiya ajratilishi haqida xabar berildi.
