Шавкат Мирзиёев 24 март куни Тошкент халқаро инвестиция форуми ялпи сессиясида нутқ сўзлайди. Бу ҳақда Президент матбуот хизмати хабар берди.
Маълум қилинишича, Президент Шавкат Мирзиёев 24 март куни Тошкент халқаро инвестиция форумида иштирок этади. Давлат раҳбари форумнинг ялпи сессиясида нутқ сўзлайди.
Шунингдек, тадбирда ЕТТБ президенти Одиль-Рено Бассо, Осиё тараққиёт банки президенти Масацугу Асакава, Саудия Арабистони подшоҳлиги инвестициялар вазири Холид ал-Фалиҳ, Жаҳон савдо ташкилоти вице-президенти Сянчен Чжан, Осиё инфратузилмавий инвестициялар банки вице-президенти Константин Лимитовский, Халқаро молия корпорацияси вице-президенти Стефани фон Фридербург ҳам қатнашади.
Президент иштирокидаги сессияда BBC World News халқаро телеканалида янгиликлар бошловчиси сифатида танилган, ҳозирда эса Европа тикланиш ва тараққиёт банкининг коммуникация масалалари бўйича директори лавозимида фаолият юритаётган Жонатан Чарльз модераторлик қилади.
Қайд этилишича, 23 март куни давлат раҳбари Татаристон Президенти Рустам Минниханов бошчилигидаги Россия делегациясини қабул қилади.
Аввалроқ Президент Тошкент халқаро инвестиция форумига тайёргарлик юзасидан йиғилиш ўтказгани хабар қилинганди.
