Netflix video striming xizmati 2022 yilda 1 milliard dollar daromad yoʻqotishi mumkin. Bu haqda Stockapps ekspertlari maʼlum qildi.
Hisob-kitoblariga koʻra, Netflixʻning operatsion foydasi 2021 yildagi 21 foizdan 2022 yilda 19 foizga tushadi va kompaniya 1 milliard dollargacha daromad yoʻqotadi. Mutaxassislar bunday taxminlarni dollar kursining mustahkamlanishi va yangi kontent chiqarish narxining oshishi bilan bogʻlamoqda.
Qayd etilishicha, 2020 yilda global koronavirus pandemiyasi davrida Netflix 36 million yangi obunachini roʻyxatdan oʻtkazdi. Biroq, bu oʻsish 2021 yilda sekinlashdi.
Stockapps ekspertlariga koʻra, 2021 yili Netflix tahlilchilarning yillik daromad prognozlariga mos kela olgan, biroq u yangi obunachilarni orttirish umidida kontentga koʻproq mablagʻ sarflagan. Boshqa omillar bilan birgalikda bu 2022 yilda kompaniya operatsion foydasining pasayishiga olib keladi, deya hisoblamoqda mutaxassislar.
Kompaniyaning oʻzi “u hali ham toʻgʻri yoʻlda va investorlar yopishib olishiga hali erta”, deb hisoblaydi. Kompaniya dollar qiymatining oʻsishidan 1 milliard dollar yoʻqotadi. Uning taʼkidlashicha, soʻnggi olti oy ichida dollarning boshqa valyutalarga nisbatan oʻsishi foydaning pasayishiga sezilarli taʼsir koʻrsatgan — uning xarajatlarining aksariyati AQSH valyutasiga toʻgʻri keladi. Xizmat koʻproq kontent yaratishga eʼtibor bermoqda.
Shu bilan birga, kompaniya uzoq muddatli oʻsish strategiyasida barqaror boʻlib qolmoqda: u oʻrta muddatli istiqbolda oʻz narxlarini moslashtiradi va qisqa muddatda biznesga sarmoya kiritishga intiladi.
Netflix onlayn kinoteatrlar raqobati kuchayib borayotgan bir sharoitda kompaniyaning eng katta daromad manbasi boʻlgan pullik striming video obunalarining oʻsishi davom etdi. Kompaniyaning yanada oʻsishi uchun imkoniyatlar hali ham mavjud — hattoki AQSHdagi eng yirik striming xizmati bozorida ham u tomoshabinlar ekranlar oldida oʻtkazadigan umumiy vaqtning 10 foizdan kamrogʻiga ega.
Avvalroq tahlilchilar prognozida Netflix aksiyalarining narxlari sezilarli pasaygani xabar qilingandi. Shuningdek, Netflix ilovasiga bolalar uchun TikTok analogi qoʻshilishi haqida xabar berildi.
