Германия кузгача Россия кўмиридан, 2022 йил охирига келиб эса Россия нефтидан деярли мустақил бўлишни ният қилмоқда. Бу ҳақда Германия иқтисодиёт вазири Роберт Хабек маълум қилди.
Хабекнинг айтишича, Россия газидан воз кечиш қийинроқ бўлади, чунки Германиянинг суюлтирилган газни импорт қилиш учун ўз имкониятлари йўқ. Европа давлатлари Россиянинг 24 февралда бошланган Украинага ҳужумига жавобан санкциялар доирасида Россия энергия ташувчиларини рад этишни муҳокама қила бошлаганди.
Вазирнинг сўзларига кўра, Германия ҳукуматининг режалари Россиядан энергия импортидан бутунлай воз кечишдан иборат. Хабек Путиннинг шафқатсиз тажовузкор уруши туфайли зудлик билан эмбарго қўйишга чақираётган ҳар бир кишини тушунишини таъкидлади, бироқ у бутун мамлакат учун масъул эканини қайд этди. Шунингдек, вазир қабул қилинган қарорларнинг оқибатларини ҳисобга олиши керак.
«Гап бир оз шахсий қулайликни қурбон қилиш ҳақида эмас, балки жиддий иқтисодий ва ижтимоий қисқартиришлар ҳақида кетмоқда. Импортнинг зудлик билан тақиқланиши келгуси қишда етказиб беришнинг қисқариши, иқтисодий таназзул ва юқори инфляцияга сабаб бўлади, юз минглаб одамлар ишини йўқотади. Санкциялар шундай бўлиши керакки, биз уларга чидай олишимиз керак. Лекин биз ҳар куни, ҳақиқатан ҳам ҳар куни ва баъзан тунда ҳам Россия нефти, кўмири ва газига қарамликни камайтириш устида ишлаяпмиз», — деди Роберт Хабек.
Аввалроқ Германия «Шимолий оқим-2»ни сертификатлашни тўхтатгани хабар қилинганди. Шунингдек, АҚШ Конгрессининг Вакиллар палатаси Россия нефтини тақиқлашни маъқуллагани ҳақида хабар берилди.
