Ўзбекистон ва Туркия ўзаро товар айирбошлаш ҳажмини йилига 5 миллиард долларга етказади. Бу ҳақда Туркия Ташқи иқтисодий алоқалар кенгаши (DEİK) «Ўзбекистон-Туркия» ишбилармонлар кенгаши раҳбари Ўзгур Онур Ўзгувен маълум қилди.
Қайд этилишича, Ўзбекистон ва Туркия икки давлат раҳбарлари томонидан эълон қилинган мақсадлар сари, жумладан, иқтисодий соҳада ишонч билан бормоқда. Мамлакатлар ўртасидаги товар айирбошлаш ҳажмини йилига 5 миллиард долларга етказиш режалаштирилган.
Ўзгувеннинг сўзларига кўра, 2021 йил бутун дунё учун оғир йил бўлиб, айни пайтда пандемиядан жабр кўрган иқтисодиётларнинг ишлаб чиқаришдан тортиб савдогача, туризмдан қурилишгача бўлган барча соҳаларида тикланиш давридир.
«Туркия ва Ўзбекистон ўртасидаги савдо айланмаси 2021 йили олдинги йилга нисбатан 1,5 миллиард долларга ошиб, 3 миллиард 645 миллион долларга етди. 2021 йилда савдо айланмаси 2020 йилга нисбатан 72 фоизни ташкил этди», — деган Ўзгувен.
Ишбилармонлар кенгаши раҳбари Ўзбекистонни «Туркия учун ниҳоятда муҳим бозор» деб атаган. Унинг таъкидлашича, икки давлат ўртасидаги импорт ва экспорт баланси энг мувозанатлиларидан биридир.
«2021 йилда Туркиянинг Ўзбекистонга экспорти ҳажми 1 миллиард 845 миллион долларни, импорти эса 1 миллион 800 миллион долларни ташкил этди. ‘Ўзбекистон-Туркия’ ишбилармонлар кенгаши икки давлат ўртасидаги мувозанатли савдо ҳажмини сақлаб қолиш ва ошириш, алоқаларни янада мустаҳкамлаш устида ишламоқда», — деган Ўзгувен.
Шу билан бирга, ишбилармонлар кенгаши раҳбари Ўзбекистонда турк капитали иштирокидаги компаниялар сонининг ўсишига эътибор қаратган. Жумладан, 2021 йили республикада турк капитали иштирокида 407 компания ташкил этилган. Туркия 2021 йилда Ўзбекистон бозорида хорижий капитал иштирокидаги энг кўп компания ташкил этган давлатга айланган.
Аввалроқ Ўзбекистонда қайси давлатлар капитали иштирокидаги корхоналар кўплиги хабар қилинганди.
