Иситиш мавсумида табиий газ билан таъминланмаган ёки газ етказиб бериш имконияти чекланган ҳудудлардаги хонадонлар ноябрь ойи учун электр энергияси тўловини 350 кВт·соатлик базавий меъёр асосида тўлайди. Бу ҳақда Энергетика вазирлиги маълум қилди.
Вазирлар Маҳкамасининг 31 октябрдаги 601-сон қарорига кўра, бундай хонадонлар учун иситиш мавсумида электр энергиясининг ойлик базавий меъёри 200 кВт·соатдан 350 кВт·соатга оширилди. Рўйхатга киритилган хонадонлар ойига 350 кВт·соатгача электр энергиясини 1 кВт·соати учун 650 сўмлик базавий тариф бўйича ишлатади.
Янги меъёр 1 ноябрдан амал қилади. Шу сабабли ноябрь учун якуний ҳисоб-китобда у тўлиқ инобатга олинади.
Вазирлик мисол келтирди. Хонадон ноябрда 300 кВт·соат электр энергияси истеъмол қилса, эски 200 кВт·соатлик меъёр бўйича 220 минг сўм тўлаши керак эди. Янги меъёр бўйича эса 195 минг сўм тўлайди, яъни 25 минг сўм кам.
Янги меъёрдан фойдаланиш учун ариза ёки қўшимча ҳужжат талаб қилинмайди, электр ёки газ таъминоти идораларига бориш ҳам шарт эмас. Меъёр тасдиқланган рўйхат асосида хонадонларга автоматик қўлланади.
Ҳозир «Ҳудудгазтаъминот» АЖ шакллантирган ҳудудлар рўйхатини маҳаллий ҳокимликлар ўрганиб, тасдиқламоқда. Тасдиқланган рўйхатлар «Ҳудудий электр тармоқлари» АЖга берилиб, маълумотлар биллинг тизимига киритилмоқда. Бу жараён 25 ноябрга қадар якунланиши керак.


