Ford компанияси GT суперкарининг 1966 йилги пойга прототипига бағишланган Ford GT Alan Mann Heritage Edition моделини тақдим этди. Бу ҳақда «Коммерсантъ» хабар берди.
Машина Alan Mann Racing жамоасининг қизил ва тилларанг тимсолида бўялган бўлиб, Frozen White акцентлари, ён томонлари ва интерьерида 16 рақами ҳамда бўялмаган углерод толали безаклар, шунингдек, 20 дюймли ғилдираклар билан жиҳозланган. Купенинг ички қисми қора тери ҳамда тилларанг ва қизил чизиқли алькантара билан безатилган, декоратив панеллари эса углерод толасидан қилинган.
Техник жиҳатдан Ford GT Alan Mann Heritage Edition ўзгармаган ва 600 от кучига эга 3,5 литрли V6 бензинли турбо двигатель ва 7 поғонали робот узатмалар қутиси билан жиҳозланган.
Маълумот ўрнида, Heritage Edition версиялари қаторига янги модель билан бирга яна еттита автомобиль киради: Gulf Livery Heritage Edition (2006 йил), ’66 Heritage Edition (2017 йил), ’67 Heritage Edition (2018 йил), ’68 Gulf Livery Heritage Edition (2019 йил), ’69 Gulf Livery Heritage Edition (2020 йил) ва ’66 Alan Mann Heritage Edition (2022 йил).
Аввалроқ Ford Bronco йўлтанламасининг янги версиясини тақдим этгани хабар қилинганди. Шунингдек, Ford Mustang электромобилини ишлаб чиқаришни уч баравар ошириши ҳақида хабар берилди.
