Namangandan Rossiyaning 9 ta shahriga toʻgʻridan-toʻgʻri aviaqatnovlar boshlandi. Bu haqda Uzbekistan Airways matbuot xizmati xabar berdi.
Qayd etilishicha, 2022 yilning 30 yanvaridan boshlab Uzbekistan Airways “Sharqiy” xab loyihasini ishga tushirdi. Uning doirasida Uzbekistan Airways Express Namangandan Moskva, Perm, Orenburg, Omsk, Samara, Irkutsk, Krasnodar, Yekaterinburg, Novosibirsk va Ufaga aviaqatnovlarni amalga oshirishni boshladi.
Maʼlumot uchun, Namangan–Moskva–Namangan yoʻnalishi boʻyicha muntazam qatnovlar juma va yakshanbadan tashqari har kuni “toʻliq ekonom” formatida amalga oshirilmoqda.
Namangan–Moskva yoʻnalishida aviachipta narxi 1 million 737 ming 245 soʻmdan, Namangan–Moskva–Namangan yoʻnalishida esa 3 million 244 ming 58 soʻmdan boshlanadi.
Narxlar 11 fevral holatiga koʻra amal qiladi.
