Қирғизистон Президенти Садир Жапаров Хитой раиси Си Цзиньпинь билан Хитой—Қирғизистон—Ўзбекистон темир йўли қурилишини муҳокама қилади. Бу ҳақда Kabar ахборот агентлиги хабар берди.
Қайд этилишича, Жапаров Пекинга амалий ташриф доирасида қишки Олимпия ўйинларининг очилиш маросимида иштирок этади ва Хитой раиси Си Цзиньпинь билан учрашади. Учрашувда томонлар сиёсий, савдо-иқтисодий ва маданий-гуманитар ҳамкорликнинг долзарб масалаларини муҳокама қилади.
«Муҳокама қилинадиган асосий масалалардан бири Хитой—Қирғизистон—Ўзбекистон халқаро темир йўл линиясини қуриш истиқболлари бўлади», — дейди Қирғизистон Президенти Администрацияси ташқи сиёсат бўлими мудири Жээнбек Кулубоев.
Бундан ташқари, Қирғизистон делегацияси энергетика, тоғ-кон саноати, қишлоқ хўжалиги ва таълим соҳаларида қатор лойиҳаларни таклиф этиш ниятида сармоявий ҳамкорлик масалаларини муҳокама қилишга тайёрлиги маълум қилинган.
