Toshkent viloyatida turizm salohiyatini yangi bosqichga olib chiqish boʻyicha alohida dastur ishlab chiqiladi. Bu haqda 2022–2026 yillarga moʻljallangan taraqqiyot strategiyasini 2022 yilda amalga oshirish boʻyicha “yoʻl xaritasi” loyihasida soʻz boradi.
Loyihaga koʻra, Amirsoy va Chimyon turistik majmualarida, Chorvoq suv ombori va “Toshkent dengizi” atrofida, Ohangaron, Angrendagi togʻli hududlarda qoʻshimcha turistik zonalar va dam olish maskanlari barpo etilishiga 1 milliard dollar investitsiyalar jalb etiladi va 80 ming ish oʻrinlari yaratiladi.
Shuningdek, Angren, Boʻstonliq, Parkent, Ohangaronda kamida 100 gektardan qir-adir yerlari dam olish maskanlari, dala hovlilari va yakka tartibdagi uy-joylar qurish uchun ochiq auksionga chiqariladi.
Avvalroq “Zomin” turistik-rekreatsion zonasiga yangi direktor tayinlangani xabar qilingandi.
