Ўзбекистонда хотин-қизларга тадбиркорлик учун 3 йиллик кредитлар ажратилиши белгиланган. Бу ҳақда Адлия вазирлигининг Huquqiy axborot канали хабар берди.
Маълум қилинишича, хотин-қизларни қўллаб-қувватлаш давлат мақсадли жамғармасидан хотин-қизларга тадбиркорлик учун 3 йилгача, шундан 6 ойгача имтиёзли давр билан БҲМнинг 150 бараваригача кредит ажратилади. Кредитлар туман маҳалла ва оилани қўллаб-қувватлаш бўлими бошлиғи биринчи ўринбосари тавсиясига кўра тақдим этилади.
Таъкидланишича, кредитлар тадбиркорликни ривожлантириш агентлиги ҳамда Бизнес ва тадбиркорлик олий мактаби дастурлари асосидаги ўқув курсларини тамомлаган хотин-қизларга берилади.
Шунингдек, кредитларнинг«Ишга марҳамат» мономарказлари, касб-ҳунарга ўқитиш марказлари, маҳаллалардаги касб-ҳунарга ўқитиш масканлари ҳамда Хотин-қизлар тадбиркорлик марказлари ёки нодавлат таълим муассасаларининг касбга ўргатиш ўқув курсларининг махсус ўқитиш дастурларини тугатганларга ажратилиши белгиланган.
Аввалроқ Ўзбекистонда уй-жойга муҳтож хотин-қизларни хонадон билан таъминлаш тартиби белгилангани ҳақида хабар қилинганди. Шунингдек, USAID Ўзбекистонда 500 миллион сўмлик тадбиркорлик ғоялари танловини эълон қилгани ҳақида хабар берилди.
