Ўзбекистонда солиқ органларининг банк ҳисобварақлари бўйича операцияларни тўхтатиб туриш тартибига ўзгартиришлар киритилди. Бу ҳақда Адлия вазирлиги хабар берди.
20 октябрь куни тадбиркорлик субектлари учун тартибга солиш юкини камайтиришга қаратилган қонун қабул қилинди. Ҳужжат билан Солиқ кодексининг 111 ва 112-моддаларига ўзгартириш ва қўшимчалар киритилди.
Унга кўра, солиқ тўловчининг ёки солиқ агентининг банкдаги ҳисобварақлари бўйича операцияларни тўхтатиб туриш тўғрисидаги қарор солиқ органи раҳбари ёки унинг ўринбосари томонидан қабул қилиниши мумкин.
Агар солиқ тўловчи ушбу қарорга эътироз билдирса, солиқ органи эътироз тақдим этилган кундан кейин уч кундан кечиктирмай судга ариза киритиши керак. Бундай ҳолатда операцияларни тўхтатиб туриш тўғрисидаги қарор суд томонидан қабул қилиниши мумкин.
Бунда суд тегишли қарор қабул қилгунига қадар банк ҳисобварақлари бўйича операциялар тўхтатиб турилади.
Шунингдек, солиқ тўловчи Солиқ кодексининг 111-моддаси 3-қисмида назарда тутилган ҳолатларни бартараф этса, солиқ органи операцияларни тўхтатиб туриш ҳақидаги қарорини бекор қилади.
Суднинг операцияларни тўхтатиб туришни рад этиш тўғрисидаги қарори қонуний кучга кириши ҳам чекловни бекор қилиш учун асос бўлади.
Иқтисодий процессуал кодексига киритилган ўзгартиришларга кўра, солиқ органи судга мурожаат қилганда операцияларни тўхтатиб туришга асос бўлган қонунбузилиш далилларини, солиқ тўловчига тегишли хабарнома юборилганини тасдиқловчи ҳужжатни ҳамда унинг эътирозини тақдим этиши лозим.
Қонун расмий эълон қилинган кундан эътиборан кучга киради.
